نشوى مصطفى: "وحشنى التمثيل"
كشفت الفنانة نشوى مصطفى كواليس تلقيها عمل فنى وإعتذرت عنه دون الكشف الأسباب وذلك عبر حسابها على موقع " فيسبوك".
كتبت نشوى مصطفي منشورا وعلقت:"حاحكى لكم حكاية على سبيل الفضفضة واسفة لو حازعجكم ، بقالى فترة طويلة مش باشتغل التمثيل اللي اتمناه، اللي هو طموحى، واللي هو أنا لحد اللحظة دى مامثلتش طموحى، ولا حتى شبه طموحى،إلا فى شوية اعمال يتعدوا على الصوابع ومنهم مثلًا المسرحية اللي كتبتها على مقاس أحلامى في التمثيل "سيلفى مع الموت".
أضافت:"ولان الكلام ده كان من اربع سنين فاالتمثيل وحشنى اوى، وكنت فاكرة ان اي شغل حيجى لى حوافق على طول، لقيت نفسى بيتعرض عليا ادوار باقراها واعتذر، وبعد مااعتذر اقعد فترة مكتئبة والوم نفسى طيب ليه اعتذرت، فانفسى ترد تقول لى ماهو انتى ماحسيتيش انك حابة اللي قريتيه يومين تلاتة وانسى ".
تابعت:" أول امبارح اتعرض عليا شغل والحقيقة النهارده اعتذرت، وكلمت الاستاذ المخرج المحترم الراقى وقلت له اسباب اعتذارى وكان رده كنت متأكد انك مش حتوافقى وباحترمك جدًا لانك رفضتى لان كان فيه رهان، حد قال انك حتوافقى لان بقالك كتير بعيد وانا قلت له غالبًا حتعتذر رغم ان مساحة الدور كويسة، قلت له يااستاذ مثلًا الزميل العزيز ماجد الكدوانى عمل مشهد واحد فى مسلسل عظيم اسمه تحت السيطرة، والحقيقة مفيش حد يقدر ينسى العظمة اللي عملها رغم إنه مشهد واحد الموضوع مش مساحة ".
وأوضحت:" المهم اعتذرت وخلاص ولقيت نفسى بعدها مش مبسوطة، كلمت ربنا وقلت له يارب انا مش فاهمانى وحضرتك اللي خلقتنى وعارف نقط ضعفى، وطلبت منه يفهمنى ويرضينى بالمقدر ليا ".
وختمت:" وسبحان الله بافتح الفيسبوك لقيت بوست مكتوب فيه من يترك كل أمره فى يد الله سيجد يد الله فى كل شئ يخصه، وعلى طول غمضت عينى وابتسمت لان حسيت أن ده رد ربنا سبحانه عليا وبعدها قعدت اردد اللهم إنى اسلمت لك نفسى ووكلتك أمرى فأنت حسبى ووكيلى، وصلى الله على سيدنا محمدًا النور واهله".
