إنجي علي: لازم تبقى مسئول إنك تفتح بيت وأسرة.. وممكن تتجوز ومتخلفش

حلت الإعلامية إنجي علي ضيفة في برنامج انا سعيد الذي يقدمها الإعلامي  سعيد جميل، الذي تم عرضه على قناة القاهرة والناس.

وتحدثت إنجي علي، بأن المرأة كل المجتمع، مؤكدة إنها قالت هذا التصريح في سياق مُعين وليس الغرض منه إثارة الجدل.

وقالت إنجي علي: لما قُلت التصريح ده كان بصيغة مُعينة ومكنش بالمعنى ده، لأني مؤمنة جدًا إن الراجل مهم لأنه أبويا وأخويا وابني، والست كمان مهمة ولما كل واحد بيعرف دوره بالضبط ده بيكون مهم، والمشكلة من وجهة نظري إن الأدوار اتغيرت واتلغبطت أوي للأسف الشديد.

إنجي علي: لازم تبقى مسئول إنك تفتح بيت وأسرة

وأضافت: لو الراجل بقى عليه حِمل تقيل والست بتساعده بقى هو خلاص مُعتمد إن ده إجباري إنها تنزل وتشتغل، ولكن هي بتساعده وفيه ناس واخدين ده حق مكتسب، ولو الست عايرت الراجل إنها بتصرف عليه علشان بيكون هو ضايقها وعايرها، لأ أنت اتجوزت لازم تبقى مسئول إنك تفتح بيت وأسرة.

إنجي علي للمقبلين علي الزواج: ممكن نتجوز ومنخلفش ده مش فرض

ومن ناحية أخري، حرصت إنجي علي علي تقديم نصيحة للمقبلين علي الزواج:  نصيحتي لـ ناس كتيرة أوي وفي ناس هتكون ضدي، إننا كبرنا على أن الست بتتجوز وتخلف وتكون أسرة، ولكن أنا بشوف النهاردة إن موضوع الأطفال في الجواز لازم يكون مدروس صح، ممكن نتجوز ومنخلفش ده مش فرض، لأن الطفل ده هيبقى محتاج وقت وطاقة وفلوس وحاجات كتيرة جدًا، فمينفعش إن ربنا يديك رزق كبير زي طفل وأنت تهمله أو تديه لـ دادا أنا ضد ده تمامًا الأم أم، والأب أب ولازم يكون موجود.

إنجي علي: مش كل المهرجانات باخد فيها فلوس

واستكملت حديثها قائلة: أما عن حضورها أغلب المهرجانات السينمائية والدرامية، فعلقت قائلة: أنا بطلع في كل المهرجانات ومش كل المهرجانات باخد فيها فلوس، فيه بعض المهرجانات بتكون في التليفزيون المصري ومبيكونش فيه الميزانية اللي الناس متخيلنها.