حوار| باهر النويهي: "سعيد بردود الأفعال على شخصيتي ونور النبوي ساعد في نجاح 6 شهور"
نجاح هائل حققه الفنان باهر النويهي، خلال مشاركته في مسلسل “6 شهور” بدوره “حسام”، فقد عبر عن أغلب شباب جيله وأبرز الصعوبات التي تواجههم، ونقل معاناة جيل كامل بشكل متناهي الدقة، فحول المشاهد دون أي عناء إلى واقع نعيشه، واستطاع أن يقدم الشخصية على طريقته الخاصة التي لمست قلب المشاهد، مضيفًا لمسات تحول النصوص المكتوبة إلى مشاعر حيّة تلامس قلب الجمهور.
واختص "الفجر الفني" بإجراء حوار معه ليكشف لنا كواليس مشاركته في مسلسل "6 شهور"، وكيف نجح في أبراز معاناة الشباب في الوقت الحالي.
ما التحدي الذي واجهك عند تقديم شخصية "حسام" في مسلسل "6 شهور"؟
- التحدي العظيم كان الوقت، لأن لم يكن لدي وقت لتحضير شخصيته “حسام”، وكان عندي امتحانات في نفس الوقت في معهد فنون مسرحية.
- فكان عامل الوقت بالنسبة لي صعب جدًا أن أحضر الشخصية في الوقت القليل جدًا مع فكرة الإمتحانات.
هل تخوفت من ردود الأفعال حول شخصيتك في المسلسل؟
- كنت خايف من ردود أفعال الناس من طريقة التمثيل، لأن بدأت أمثل بطريقة جديدة جدًا عليا، وكان قلقني لأن مش عارف هطلع في الكاميرا بشكل عامل إزاي.
- لأن أول مرة أجرب الطريقة دي فكنت خايف جدًا، والحمدلله أن الناس شافت ان الشخصية ملعوبة بشكل السهل الممتنع وكان لطيف وجميل.
ما هو أصعب مشهد لك؟ وكيف استعديت له؟
- أصعب مشهد كان على الروف مع نور النبوي وأنا بقوله “أني تعبت” وناس كتير كلمتني عنه وأنا حبيت أنهم قالولي أنه بيعبر عنهم جدًا، وأنا حابب أشكر المؤلفين عمرو أبو زيد وأحمد هشام على الكتابة العظيمة للمسلسل والمشهد ده بالذات.
لأنه كان لمسني لأن في فترة من الفترات في شغلي عامةً مش في الـ real estate، فكنت حاسس المشهد جدًا وكنت خايف منه، لأنه فكرة أنك بتطلعي مشاعر صادقة توصل للناس ومشهد حقيقي ده بيكون صعب جدًا.
أنا كل يوم كنت بتدرب على المشهد وأسمعه لنفسي وأذاكر وأشوف المشاعر جوا المشهد وكنت بمثله قدام صحابي فممكن يدوني تعليق يقولوا لي مثلًا محتاجين نعمل كذا.
وكان معايا صاحبي وحبيبي محمود عز بيساعدني طول المسلسل ويراجع معايا وكنت مزهقه من المشهد ده، وطبعًا جون خليل ذاكر معايا وحسن خالد، يعني أنا ذاكرته مع ناس كتير أوي على فكرة عشان أخد على قد ما أقدر ردود فعل من صحابي قبل ما يطلع للجمهور.
كيف كانت تجربة العمل مع نور النبوي؟
نور على المستوى الشخصى إنسان جميل وداعم جدًا وسلس في التعامل وبيعطي طاقه إيجابية لكل الناس المحيطين به.
كيف كانت كواليس العمل في مواقع التصوير؟
فريق العمل من الممثلين كان فيه طاقة كبيرة من الشغف والتركيز والأستمتاع، مراد مكرم، نور إيهاب، نورا عبد الرحمن، امجد الحجار ومصطفى ليشع، وطبعًا كان نفسى اشتغل مع باقى الممثلين بس محالفنيش الحظ.
والكواليس كانت مليانة طاقة إيجابية طاقم العمل كله كان بيساعد بعض إننا نطلع أحسن شغل، من فريق التصوير ومساعدين الإخراج والإنتاج.. كانت من أحلى الكواليس اللي حضرتها.
ماذا عن تجربة العمل مع المخرج مصطفى صولي؟
-التجربة مع أستاذ مصطفى سولي كانت عظيمة، تحدث معي قبل التصوير واتفقنا على أبعاد الشخصية إلى أن وصلنا بالشخصية للشكل النهائي المقرر عرضه.
ما رأيك في ردود الفعل على شخصية "حسام" ومسلسل" 6 شهور" عبر مواقع التواصل الاجتماعي؟
-أولًا أنا فرحان جدًا أن الناس استقبلته بالطريقة دي وحسوا أن الشخصية شبههم والمسلسل شبه ناس كتير موجودة وعرفتنا عن عالم جديد بيجلنا تليفونات منه.
بس أحنا مش بنكون معه فعرفت الناس على شغلانة مهمة موجودة دلوقتي بشكل كبير وفي نفس الوقت قدمته بشكل محترم بيليق بكل الأسرة.
والحلو كمان إنه شبابي جدًا والعناصر الشبابية أكثر، بداية من أستاذ صولي المخرج وخالد الجبري اللي عامل المزيكا فالفريق كله شباب حتى المصورين إيهاب فاس ونور مصطفى وشيكا وثابت وراجية المنتجة، فأحنا شباب وعملنا حاجة للشباب ووصلت لهم فأحنا فرحانين أننا قدرنا ننوصل الشيء ده.
وطبعًا نور النبوي ونور إيهاب نجوم دلوقتي بشكل كبير وليهم جماهيرية وده ساعدنا أن الناس تتفرج على المسلسل وتركز معه وتشوف أننا بنقدم عمل حلو ومحترم.
وبالنسبة لـ “حسام" أنا مبسوط جدًا بردود فعل الناس وحست به وأن مفيش حد طيب بالشكل ده وفي ناس كتير حاسين أن “حسام” بيمثلهم في فكرة أن ممكن بيعملوا حاجات كويسة جدًا في الشغل ويجي حد يأذيهم في حاجة.
وأن الناس اللي بتشتغل كتير وتحقق إنجازات كتير بدري بتبدأ تحس أنها تعبت ومش عارفة تعمل إيه وممكن الشغل بتاعهم مش زي الأول وهما مش عارفين السبب.
ما أوجه التشابه بين حسام وباهر؟
نقدر نقول “باهر” عاش نفس أزمات “حسام” في الشغل بس مش في الـ “SALES”، فيعتبر أنا قريب جدًا من حسام الفرق أني ماستسلمتش وطول الوقت بشتغل على نفسي ومكمل.
ولكن حسام إلى حد ما يأس واتجه للمخدرات عشان يقدر يهرب من فكرة أنه حاسس بالفشل.
هل عملت بالتسويق العقاري من قبل ؟
اشتغلت لمدة شهر فى شركة تحسبًا إني ممكن فى يوم من الأيام أعمل شخصية زي حسام.
من وجهة نظرك ما رسالة مسلسل "6 شهور"؟
- أن الواحد لازم يركز على هدفه ويعمل الشيء اللي بيحبه، وده هيساعده أنه ينور فيها سواء كان دلوقتي أو بعد فترة ومش عيب أنك تكتسب معلومات من أماكن مختلفة وتجرب حظك وتشتغل في أماكن مختلفة وخبرات من أماكن مختلفة.
- لأن كلنا بنتعلم وطول الوقت بنتعلم وبنستفاد من اللي حوالينا سواء كانت ورش عمل أو غيره، فمن وجهة نظري أن الرسالة هي اجتهد وركز هتحقق حلمك.
ما الفكرة أو القضية التي تتمنى أن تناقشها في عمل درامي؟
أتمنى أن أناقش أكتر أمراض نفسية والأشخاص اللي بيعانوا من أمراض نفسية ومش عارفين يعبروا ومش عارفين يوصلوا شعورهم للناس أو يواجهوا نفسهم ولا العالم.
فأنا أحب جدًا أخوض التمثيل في عمل بيوعي الناس بالمشاكل النفسية لو عندهم مرض فهو مش عيب كلنا بنمر بمشاكل نفسية.
بعد نجاحك في "6 شهور"، حديثنا عن جديدك؟
حاليًا مفيش جديد غير أن في المعهد وبدرس فنون مسرحية.
