ريهام سعيد عن "النمر قاتل طفلة العياط": "لية أرواحنا رخيصة كده"

عبرت الإعلامية ريهام سعيد، عن مدى حزنها على الطفلة التى قتلت بسبب مهاجمه نمر لها فى العياط، حيث قالت: "لية ارواح الناس رخيصة كدة، مين اللى بيدى رخصة للناس دى".


وأضافت خلال برنامج "صبايا الخير" على قناة "النهار" قائلة: "لما روحنا المرزعة دى، لقينا هياكل عظمية بتاعت اسود، اقفاص الاسود بترابيس مصدية والباب مسنود بحجارة، ولما دخلت المزرعة لقيت الاسود فى الاقفاص هياكلونى، قالولى بقالهم يومين مبياكلوش، اية ذنب الحيوانات دى، اشمعنا صبرى نخنوخ لما كان عندة اسود الدنيا قامت عليه، وقال عشان مش مترخصة، واية الفرق حتى لو مترخصة يعنى اية يربى اسد يهدد كل سكان المنطقة، ويوم ما يتعمل مدرسة للاحتياجات الخاصة يسألوا طيب فين الرخصة، اى حاجة تتعمل صح فى البلد دى لازم تبوظ".


وتابعت قائلة: "مزرعة بتربى اسود تاخد رخصة مينفعش ده مكان مرعب، وفى الاخر هيبقى قتل خطأ والنمر الجانى بقى ونترحم على النمر ومفيش حد هيتعاقب صح، لكن انا برضة شايفة ان النمر مالة يتقتل ويتسحل ليه ده روح اتخلق كدة وهى دى طبيعيته عنيفه، لكن السبب فى اللى حصل كله اهمال صاحب المرزعة واللى بيقولوا اصل اخوه مستشار وانا لسة مش متاكدة من المعلومة وحتى لو صحيحة، مستشارين وقضاة مصر مثال للشرف والعدل".