رسالة مؤثرة من رحاب الجمل في رثاء "الساحر" محمود عبد العزيز
نعت الفنانة رحاب الجمل، الفنان محمود عبد العزيز، وكتبت من خلال صفحتها على الفيس بوك تعزية ومواساة لأبنائه "ربنا يصبركم محمد وكريم محمود عبد العزيز أولاد الاستاذ ويصبر زوجته .... أغلب اللي عنده حد غالي توفي بيكون عارف اللحظة ديه في الوقت ده بتكون واقف بين الناس كلها ولكن الناس بتبقي في دنيا وانت في دنيا تانية خالص".
وأضافت الجمل "هما بيبقى كل تفكيرهم العزاء والواجب وبيطبطبوا عليك وانت بيبقي تفكيرك هو انا مش هشوفه تاني؟ هو أنا المفروض اعمل ايه دلوقتي عشان اشبع منه؟".
وتابعت: كل الناس موجودة اصحابه واحبابه وزمايله وقرايبه امال هو فين ؟ بتبقي شايف الناس طشاش لسانك اللي بيرد عليهم لكن مخك وقلبك وعنيك في مكان تاني خالص اللي بيحصل ان قدرات استعاب مخك في اللحظة ديه بتندم علي كل فرصة ضيعتها بعيد عن حضن كان المفروض يتحضن ومتحضنش علي كلمة حلوة كانت المفروض تتقال ومتقالتش علي ضحكة استخبت ومطلعتش.
وأكملت "بتفكر في حتة منك راحت ومش هاترجع تاني حتة حلوة حتة من العمود الفقري بتتكسر بس مش من العمود الفقري بتاع ضهرك العمود الفقري بتاع حياتك".
واختتمت "هايصبرك حب الناس كلمات حلوة في حقه ذكري جميلة بتتحكي عنه خير قدمه لأحدهم ولا تتبقي سوي ذكراه".
