بعد إعلان إصابته بمرض البهاق.. أسرة رامي جمال تدعمه والأخير: الحمد لله علي نعمة الأهل

وكتب رامي، في المنشور: "الحمد لله الذي احبني ف ابتلاني واقدرني علي الصبر من فتره ظهرت بقع بيضا في جسمي وبالكشف عرفت انه #البهاق وجربت أنواع علاج كتير ودكاترة كتير ومفيش فايده رضيت وسلمت امري لله علشان عرفت ان الزعل بيزوده وكفايه شغلانتي وصعوبتها والقلق الدائم من المستقبل وفعلا بقي بيزيد لدرجه لفتت نظر ناس كتير اللي بقي يقوللي هتتعامل ازاي وانت فنان واللي يخاف يسلم واللي يسألني هو ده معدي انا بقالي سنه فعلا لو عندي حفله او تصوير بتعب علي ما اشوف طريقه أخفيه بيها لدرجه خلت ناس تقوللي شوف بيزنس تاني اعمله علشان الناس مش هتقبلك كده فكرت في كلامهم بصراحه ولقيت ان عندي حلين يا فعلا شكرًا لحد كده علي الشغلانه دي رغم حبي ليها وعدم معرفتي بغيرها يا اما مش هداريه تاني وتقبلوني بيه وترحمو كل اللي ربنا ابتلاهم بيه من نظره انه شكله غريب ".

واختتم حديثه بجملة: "الحمد لله علي نعمه الأهل لانهم الوحيدين اللي بيقبلوا الواحد زي ما هو طولت عليكم بس قلت أشرككم في حياه فنان".


دعم ورسايل من أسرة رامي جمال

خيم حزن شديد علي أهل الفنان رامي جمال، محاولين بشتي الطرق دعمه نفسيا ومحاوله التخفيف من إكتئابه.


حيث كتبت له والدته عبر منشوره علي"الفيسبوك": " حبيب قلبي وعمري كله.. الابتلاء ده من ربنا وماحدش يقدر يبعد اي ابتلاء ربنا اختاره ليه.. نحمد ربنا احنا ارحم في الابتلاء من غيرنا.. ربنا يشفيك ويعافيك ويرضيك بقضاؤه.. الحمد لله في جميع الأحوال ياعمري".


ووجه شقيقه الأكبر محمد جمال، رساله دعم إلي رامي، عبر"الفيسبوك" قائلا:"أنا فخور بكل اعمالك وفنك وفخور بشخصك وطيبة قلبك وانك بعد كل المشوار ده ونجوميتك ماتغيرتش مع حد ولا اتكبرت على حد ولسه حتى بتنام وتصحى بدري زي زمان وانت صغير..مبسوط انك قررت تتكلم وتطلع اللي جواك وتواجه التغيرات اللي مش على مزاجك ومبسوط انك مخبتش حاجة ومش في دماغك، انا حاسس بيك عشان عارف قلبك وطريقة تفكيرك وان عقلك مابيبطلش تفكير وشايف انك قوي وده اللي مخليك مكمل رغم كل الصعوبات اللي واجهتها ولسه بتواجهها، يمكن ناس كتير فاكرة ان الفنان حياته سلسه وكلها هزار وضحك وفلوس وحفلات ودي حاجة بعيدة جدا عن الحقيقة.

وأضاف: "من زمان فيه مشاكل وهايفضل فيه مشاكل عندي وعندك وعند احمد زي ما كان بابا وماما عندهم مشاكل دي طبيعة الحياة، يمكن يا روكا حياتنا فيها مطبات كتير اوي بس عشان احنا طيبين وعندنا اصرار وبنحب الخير لأي حد فا كله بيعدي والدنيا بتمشي، انت فنان مختلف وكبير والسي في بتاعك يكفي عشر فنانين جداد يعملو بيه اسم، موضوع انك تبطل مش خيار ليك ومش بمزاجك عشان انت عمود من اعمدة المزيكا في الوقت الحالي وليك حتتك المختلف فيها زي باقي الفنانين المتواجدين حوالينا دلوقتي".

واختتم قائلا: "انت مكمل عشان ده مصيرك وشغلتك وحياتك وتعبك، البومك الجاي هايحطك في مكانك الصحيح رغم المطبات العجيبة اللي حصلت، ولو اطول اخد منك الكام بقعة اللي مزعلاك دي اخدها..والله لو بايدي اخدها..والله ياسيدي..وهاتروح لو روقت بالك وسيبتها ومديتلهاش اهتمام واتعاملت انها واقع زي مابتعمل انت دلوقتي..رغم انك اسوأ لاعيب بلايستيشن ولعبك حقير وتكسير وعرقلة من الخلف في الانفرادات بس بحبك وانا معاك وكلنا معاك وفي ضهرك يا توربيني".

وكتب شقيقه أحمد علي "الفيسبوك"،:مش لاقي كلام بس اكيد ربنا هيعوضك على اللي قولته ده واللي مقولتوش كمان.. ربنا ميحرمنيش منك ويشفيك ويخليك ليا ولياسين ولكل حبايبك دعواتكم لرامي أبو قلب مفيش زيه".


وعلقت زوجته علي منشوره وكتبت: "أنا بحبك وبحب قلبك اللي مفيش أحلي منه في الدنيا وياريت عندهم ربع القلب دا بس".