"إذا كنت ممثلا في بداية الطريق".. المخرج تامر محسن يقدم نصائح حول أول يوم تصوير
نشر المخرج تامر محسن نصائح وجهها إلى الممثلين، تتعلق بأول أيام التصوير خلال أي عمل يشاركون به؛ وذلك من خلال منشور نشره من خلال حسابه الشخصي، عبر موقع التواصل الاجتماعي "فيسبوك".
أوضح تامر محسن للممثلين كيف يحافظون على تركيزهم أمام تساؤلاتهم القلقة وتوترهم مما قد يحدث في مواقع التصوير، فكتب: "أغلب الممثلين ما بيحبوش يشوفوا أدوارهم الأولى، وأحيانا ما بيحبوش يشوفوا أول يوم تصوير أو أول مشهد صوروه، بيحسوا إنهم عايزين الزمن يرجع بيهم لليوم ده ويعيدوا التصوير تاني".
وعن سبب هذا الشعور قال تامر محسن: "عشان بيحسوا إنهم أحسن بكتير من اللي طلعوه قدام الكاميرا، ده بيحصل عادة في الأعمال الأولى للممثل عشان ما بيبقاش مدرّب كفاية إنه يشتغل بذهن صافي، والتمثيل محتاج ذهن صافي، لكن لو الذهن مشتت بأسئلة كتيرة هتشوشر على الممثل".
وذكر تامر محسن أن أسئلة من نوع هو "أنا كويس ولا لأ"، و"هما مبسوطين مني ولا لأ"، "هو المخرج مكشر ليه"، و"أعمل إيه مع النجم اللي قدامي"، "يا ترى أنا أصلاً ممثل موهوب"، و"طب أنا حاسس إن شكلي أو لبسي مش كويسين"، وأردف:"هو أنا لو غلطت هيزعقوا فيا ولا هيعملوا إيه؟ هما هيسيبوني أروّح امتى؟ وبيكتشف فجأة إنه مش بيمثل كويس"، وأضح: "بيكتشف إن الدور اللي حافظه مش عارف يأدي فيه لأنه مشوشر الذهن".
وأضاف تامر محسن: "الحقيقة إن الدراسة والحرفة والممارسة بتخلي الممثل يبقى على قدر أعلى من الاحتراف، بحيث إنه يقدر يصفي ذهنه أو يكون خلاص جاوب على الأسئلة دي، بقى عنده ثقة في نفسه عرف إنه ممثل كويس، عرف إن الناس بتحبه، عرف إن لو المخرج مكشر دلوقتي فهو مكشر علشان أسباب أخرى ملهاش علاقة بيه، عرف إزاي يتعامل مع الممثل اللي قدامه، عرف إزاي ما يبوظش أعصابه لو غلط في take".
وفي السياق ذاته تابع تامر محسن: "بعض الممثلين أحيانا لما بيغلطوا في take بيتوتروا فبيبقى الـtake اللي بعده أسوأ، بيحس إن الحكاية بتكبر معاه ويبقى كل اللي نفسه فيه إن المشهد ده يخلص بأي شكل عشان يجري على أوضته، كل دي حاجات بتأثر جدا في الممثل وبتخليه مش عارف يطلّع كل اللي عنده، ونفسه يعيد أعماله الأولى تاني".
اختتم تامر محسن نصائحه قائلًا: "دي حاجة حلها الوحيد هو التدريب، التدريب على إني ما أسيبش أي حاجة تشوشر عليا وأنا قصاد الكاميرا، قبل ما تدور الكاميرا أصفي ذهني تماما ومافكرش في حاجة غير الشخصية، في حاجات كتير بتحصل حواليا مش مفروض تاخد من عقلي، أو اهتمامي أو تركيزي، والحقيقة إن المخرج نفسه في أول يوم تصوير بيكون عنده نفس النوع من الأسئلة تجاه شغله وقراراته، ده شيء طبيعي جداً في أول يوم شغل.. بس مفروض ما ياخدش من تركيزنا".
