"يارب إحنا كمان نتغير".. نشوى مصطفى تروي قصتها مع المصالح الحكومية

كشفت الفنانة نشوى مصطفى، عن سعادتها بالتطور الذي حدث في الخدمات الالكترونية التي تقدمها جمهورية مصر العربية.

وكتبت نشوى مصطفى عبر صفحتها على موقع التواصل الاجتماعي فيسبوك قائلة: "بلدنا أد الدنيا، النهاردة كان عندى تجربة عظيمة منتهى الإيجاب والإحساس بالفخر بوطن عظيم بيتغير للأفضل وبالبرهان مش كلام، من سنتين تلاتة كنت بعمل توكيل فى الشهر العقارى فى التجمع الخامس، أول يوم روحت كانت الساعة 9 الصبح قالوا لى حضرتك اتأخرتي لازم تكونى هنا الساعة سبعة ونص تاخدي رقم، قلت لهم طيب ماخد رقم دلوقتي".

وتابعت" قالوا لى الأرقام خلصت فوتى علينا بكرة، وروحت بكرة سبعة ونص وقفت طابور عشان أخد رقم، طابور طويل ولما وصلوا لنص الطابور قالو لنا خلاص الأرقام خلصت فوتوا علينا بكرة".

واستكملت: "اتنرفزت أنا وغيري وزعقنا ومشينا بعد ما فيه حد ابن حلال قالى مدام نشوى، عايزة تلحقي تعالى خمسة الصبح احجزى مكانك فى الطابور وانتى تلحقي، المهم بعد محاولات أربع أيام عملت التوكيل".

وأضافت: "النهاردة احتجت أعمل توكيل، روحت أخدته فى تلات دقايق، أقسم بالله تلات دقايق، عملت الإجراءات أونلاين وأنا قاعدة فى بيتى ودفعت الرسوم أونلاين، وروحت استلمته فى تلات دقايق، المكان مكتب توثيق التجمع الخامس بمحكمة القاهرة الجديدة".

واختتمت: "بلدنا بتتغير.. يا رب احنا كمان نتغير، احنا مش أقل من دول العالم، شكرًا يا بلدنا.. شكرًا وزارة العدل.. شكرًا الشهر العقارى.. مصر أد الدنيا.. الجمهورية الجديدة وتحيا مصر، تحيا مصر، تحيا مصر".