هنادي مهنى لـ "الفجر الفني: "السيدات كانت مظلومة وبسبب دون ضمان عرفوا يخدوا حقهم "

أعربت الفنانة هنادي مهنى عن سعادتها البالغة بالمجتح الكبير الذي حققته حكاية “دون ضمان”، مضيفة:" أنا كنت متخيلة إن البنات أو السيدات هتتشد جدًا مع القصة أمهات أو بنات  أو حد لسة هيتجوز  أو حد متجوز، بس مكنتش متوقعة أن الموضوع هيكون كدة".

وأضافت هنادي مهنى في تصريح خاص لـ "الفجر الفني": "الحمدلله أنا مبسوطة جدًا إن كان في ناس كتير مكنتش عارفة أنهم مظلومين وأكتشفوا أنهم مظلومين، مكنوش عارفين يخدو حقهم إزاي، وبسبب المسلسل عرفوا يخدوا حقهم  ويردوا إعتبارهم ويدافعو عن حقهم، وعارفين لو هما مظلومين ميسكتوش على حقهم، ودي حاجة فارقة معايا طبعًا أن أخلي الناس أحسن ".

وتابعت:" الرجالة مضايقة  مني شوية، كل ما أقابل راجل  في السوبرماركت مثلًا يقولي أنا مراتي عالفكرة من ساعة ما تفرجت على المسلسل وهي عاملة مشاكل في البيت، فأنا مبسوطة، برافو للستات".

ووجهت نصيحة للبنات والسيدات القابلين على الزواج:" بقول للبنات متتجوزوش أي حد يخليكم تتنازلوا عن طموحاتكم وأحلامكم، متبقاش هي الشخصية اللي قاعدة في البيت مش بتعمل أي حاجة غير بسلة وجزر، تحاول تعمل حاجة هي بتحبها.. ولو الراجل هيوقفها عن ده يبقى لاء".

وأضافت: “ إن شاء الله هتلاقي نصيبها وهتلاقي راجل يشجعها على ده وهتلاقي راجل بيحبها، أيًا كان هي عايزة إيه، عمومًا اختاري الشخص اللي بيقدرك وشايفك أحسن حاجة ومش شايف أحسن منك علشان انتي تستهلي ده”. 

وأكملت: "كل بنت في الدنيا تستاهل ده.. كل واحدة فيها عيوبها زي مافيها مميزاتها.. بس أنا متأكدة أن مميزاتها هتخليها تستاهل الراجل الصح بنسبالها هي،نفس القصة برضو للرجالة لما تيجي تختار الست متظهرش حاجة قبل الخطوبة وبعد الجواز يكون حاجة تانية، اللي هتعملوا بعد الجواز لازم يكون صريح من أول يوم علشان متظلموش حد معاكوا، بعد ما تسيب بين أهلها وتاخد هدومها وتصرف على الجواز وتجهز نفسها في الأخر تكتشف أن الشخص ده مش كويس، دي مش حاجة حلوة، بتكسف ترجع لأهلها، بتكسف أنها تعيش مطلقة".

وتابعت:" دي حاجة كارثية بتقابلها الستات بيخافوا من الموضوع ده بيخافو أنهم يبانو أنهم تافهين جدا قدام أهلهم بيخافو أنهم يرجعوا يعيشو تاني مع ماماتهم وباباهم زي زمان...، أنا بجد بنصحهم أنهم يفكروا في الموضوع ده كويس جدًا قبل ما يخدوا القرار لأن الموضوع مش سهل..، زي مثلا ده انا حد متقدملي طب هشوفوا طب هتجوزوا، لا خدي وقت أكتر إنك تتعرفي على  الشخص ده..، وأهم حاجة للرجالة أنها تكون صريحة قبل الجواز".

“ دون ضمان” بطولة هنادي مهنى، وهاجر أحمد، وأحمد بدير، وحنان سليمان، وسيناريو وحوار يوسف وجيه، وإخراج ياسمين أحمد كامل.