عمر كمال:" حمو بيكا لازم ياخد كارنيه مؤدي مهرجانات واللي يوقفه قدام لجنة استماع يبقى بيظلمه"
كشف المطرب عمر كمال، عن رأيه في القرار الذي أصدرته نقابة المهن الموسيقية مؤخرًا بمنع ١٩ مطرب من الغناء، مُضيفًا: "عندي حل للخناقة الدايرة دلوقتي بين نقابة الموسيقيين ومطربي المهرجانات، تتمثل في عمل شعبة للمهرجانات مثلما تم إنشاء شعبة للراب".
وقال عمر كمال، خلال تصريحات تلفزيونية له: "زي ما وافقنا على عمل شعبة لفن الراب لازم يتعمل شعبة للمهرجانات، واحتواء مطربي المهرجانات وتقنين أوضاعهم وعمل تصاريح ليهم، والمهرجانات بقت مسيطرة على الساحة لأن مفيش إحتواء ليها".
وأشار عمر كمال إلى أنه يحترم قرار نقيب المهن الموسيقية الفنان هاني شاكر، مُضيفًا:" أنا مع الفنان هاني شاكر إن فيه كلام مينفعش يتقال، وفيه ناس مينفعش تغني، ولكن لازم نحتوي الناس بتاعت المهرجانات".
وأكد عمر كمال على أن وقوف المطرب حمو بيكا أمام لجنة لاستماع الأصوات سوف يعرضه للظلم، لافتًا: "حمو بيكا لازم ياخد كارنيه مؤدي مهرجانات، واللي يوقفه قدام لجنة استماع للأصوات زي حلمي بكر يبقى بيظلمه".
وأشار عمر كمال على أن بعض مطربي الراب أغانيهم تشتمل ألفاظًا سيئة، قائلًا:" نقابتنا المحترمة أجازت الراب، ومنحته مساحة كبيرة جدًا على المسارح وشرعية، وما شاء الله برضو بيعملوا بلاوي أكتر من المهرجانات وشغالين، أغاني كتير جدًا ليهم فيها خناقات برضو وشتائم وقلة أدب، ومع ذلك النقابة اعترفت به وعملتلهم شعبة، طيب ما إحنا نعمل شعبة مهرجانات ببساطة".
واختتم كلامه قائلًا:" زي ما عمر كمال راح النقابة ومضى إقرار أن أي أغنية هينزلها هتُجاز من الرقابة، ده يتعمم ونعمل شعبة للمهرجانات، لكن موضوع الأصوات ما هو برضو بتوع الراب مش أصوات، بتاع الراب مش بيدخل يمتحن في الأطلال وعمر الخيام يعني، ما هو بيدخل يغني راب، يبقى بتاع الراب يدخل يغني راب، وبتاع المهرجانات يدخل يغني مهرجانات، خلوا المهرجانات فن زي الراب".
