"أهم راجلين في حياتي".. مريم نعوم تعلق علىى تكريمها كواحدة من خمسين سيدة الأكثر تأثيرا

علقت السيناريست مريم نعوم، على تكريمها في منتدى الخمسين سيدة الأكثر تأثيرا، وذلك من خلال منشور عبر حسابها على موقع التواصل الاجتماعي “فيسبوك”.

وكتبت “نعوم” قائلة: “كالعادة بعد كل خطوة لقدام.. بقف في مكاني شوية أتأمل تحت رجلي عشان أدرك أنا واقفة فين بجد مش في خيالي.. وجاية منين.. وعايزة أروح فين…والحقيقة إن مع كل خطوة.. وقفة التأمل بتطول لأني مش بكون متوقعة اللي بيحصل حيث إني شخص بيشتغل دون حسابات.. شخص بيعمل اللي بيحبه.. فتحصل له حاجات.. ساعات حلوة.. ساعات قاسية.. لكن كلها خطوات في رحلة طويلة أكاد أجزم إن مفيش ولا خطوة فيهم كانت بحسابات عقلية.. كلها كانت سعي صبور ورا أحلامي بمحبة وشغف حقيقيين”.

وتابعت قائلة: “مبارح بعد التكريم قعدت أفكر هو أنا إزاي واقفة هنا في اللحظة دي؟ إيه اللي جابني هنا وفكرت في كل الناس اللي ساهموا في تكويني وعلموني وساعدوني أو شاركوني رحلتي العملية اللي وصلتني للحظة دي. ودول ممكن أقعد أكتب أسمائهم لبكرة.. أمي وأبويا والعيلة والأصدقاء وزملاء الدراسة والأساتذة في كل المراحل وزملاء المهنة وشركاء العمل.. أسماء كتيرة جدا جدا جدا.. وحقيقي ممتنة ليهم كلهم.. زي ما عارفة برضه إنه أكيد أنا كمان ساهمت وشاركت في أحلام آخرين لأننا كلنا بنأثر في بعض بصورة أو بأخرى”.
 

وأضافت: "بس في شخصين هما أكثر اثنين وقفوا في ضهري.. جوزي وابني… أيون.. راجلين.. مش ستتين… من غير استيعابهم لطبيعة شغلي ومشاكله وثقله وهمومه مكنتش هعرف الاقي مكاني. 
عارفة إنهم كتير بيتخنقوا مني عشان ببقى مسحولة ومتدهولة وكئيبة أثناء الشغل.. بس بالرغم من كل ده طول الوقت بيستحملوني. جايز سهل علينا تامر وأنا إننا نستحمل ونشيل بعض عشان بنشتغل في نفس المجال. لكن مروان اللي حضر اول اجتماع شغل وهو عنده ١٠ شهور ده داعم حقيقي وصادق ليّ.. ودائما بشكره.. من غير تفهمه لطبيعة شغلنا كنا هنبقى أب وأم معذبينط.

واختتمت قائلة: “بقول كل ده ليه.. عشان بالرغم من اني اتكرمت كواحدة من ٥٠ سيدة مؤثرة.. بس الداعمين الحقيقيين إللي ادوني مساحتي إني أقف على أرض تساعني وتستوعب أحلامي.. هما أهم راجلين في حياتي وأحب أقولكم إن اللي فات كوم.. وال ٦ شهور الجايين كوم تاني خااااالص”.