شريف إدريس يعلن اعتزاله للفن ويُعلق:" مادام الشغل بقى بالشحاتة يبقى بلاش أحسن"
أعلن الفنان شريف إدريس منذ قليل اعتزاله للفن، بسبب الضغوطات التي يتعرض لها عند التعاقد على أي عمل فني، وذلك من خلال حسابه الشخصي على موقع التواصل الاجتماعي "فيسبوك".
كتب شريف إدريس منشورًا قال فيه:"بسم الله الرحمن الرحيم، بعد ٣٥ سنه سعي وتعب وشقي في الوسط الفني قررت الاعتزال والابتعاد تماماُ وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد".
وتابع قائلًا:"وده قرار أخدته بعد ما الأمور وصلت في الوسط الفني لمرحله عبثيه وصلت إني بقيت بشوف بعض الزملاء بيشحتو الشغل علني علشان يشتغلو لإن الشغل بقى متقسم علي ناس معينة، فلو الأمور وصلت لكده ابعد أحسن، وحتي لما بيجي شغل بيتفرض عليك توافق باقل الفلوس وتخرج من الشغل مديون ومواقف مهينه زي إن شركة انتاج تعرض عليك اجر هو قيمة ربع أجرك والسبب إن الميزانية مصروفه عالديكور، طب خلو الديكور يمثل".
وأضاف قائلًا:" هحكيلكم موقف حصل معايا من إسبوع، اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور، كان هيجيلي جلطة بعد ماقفلت المكالمة ووافقت علشان أنا محتاج اشتغل ومحتاج فلوس، وماقدرتش أستوعب الفكرة، بصراحه إني بعد العمر ده مضطر أدفع علشان اشتغل فاتصلت واعتذرت، وده الحال حاليًا إن الأمور بقت في إيد كاستينج دايريكتور، وده موقف من مواقف كتير مريت بيها لو حكيتها محتاجه كتاب مش بوست عالفيس، فطالما الشغل بقي لازم يتدفعله، وطالما الشغل بقي بالشحاتة، يبقى بلاش أحسن ".
وواصل كلامه قائلًا:" أنا طول عمري راضي الحمد لله، بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي؛ لأني وصلت لمرحلة نفسية ومادية إني بقيت مش قادر اربيهم ولا أصرف عليهم وأنا عندي تلات أطفال بعبدهم عباده متخيلين حجم المسؤلية، وبقيت مديون لطوب الأرض".
واستكمل قائلًا:" حقيقي لو حد عنده فرصة سفر ليا هاكون شاكر ليه جدًا وهيكون جميل في رقبتي لحد ما أموت؛ لأن حقيقي أنا مش قادر أعيش في البلد دي تاني، أنا حاولت اسعي في أي مجال تاني بس ماقدرتش، وحقيقي لو اتعرض عليا بطولات بعد البوست ده هرفضها؛ لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي، والحمد لله علي كل شئ، همسح ابلكيشن فيسبوك من تليفوني؛ لإني هنزل ابيع تليفوني أصلًا، فأنا هكون متاح اونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من أي حد، ملحوظة أنا مش محتاج طبطبة من حد، أنا محتاج فرصة سفر وشغل تخليني أعيش ولادي حياة كريمة وبس".
واختتم كلامه قائلًا:" شكرًا ليكم محبتي للجميع، هاين عليا أقوم ارمي نفسي من البلكونه بعد ماوصلت إني اكتب البوست ده".
