شريف ادريس: بقيت أنام أحلم أني بقتل عيالي ونفسي

أعلن الفنان شريف ادريس، عن اعتزاله الفن، والابتعاد تمامًا، وتغيير مسار حياته، بعد ما وصل الحال لمرحلة عبثية على حد قوله.

وكتب شريف ادريس، منشورًا عبر صفحته الشخصية على موقع التواصل الاجتماعي "فيس بوك" معلنًا فيه اعتزاله والأسباب التي أدت لاتخاذه هذا القرار قائلًا: "بسم الله الرحمن الرحيم.. بعد ٣٥ سنه سعي وتعب وشقي في الوسط الفني، قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد.. وده قرار أخدته بعد ما الأمور وصلت في الوسط الفني لمرحلة عبثية وصلت اني بقيت بشوف بعض الزملاء بيشحتوا الشغل علني علشان يشتغلوا ".

وأضاف" ادريس": "فلو الأمور وصلت لكده ابعد احسن.. وحتى لما بيجي شغل بيتفرض عليك توافق باقل الفلوس وتخرج من الشغل مديون.. ومواقف مهينة.. طب خلو الديكور يمثل".

وتابع: "هحكيلكم موقف حصل معايا من أسبوع..اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور..كان هيجيلي جلطة بعد ماقفلت المكالمة ووافقت علشان انا محتاج اشتغل ومحتاج فلوس..وماقدرتش استوعب الفكرة بصراحة اني بعد العمر ده مضطر ادفع علشان اشتغل فاتصلت واعتذرت… وده الحال حاليا ان الأمور بقت في ايد كاستينج دايريكتور.. وده موقف من مواقف كتير مريت بيها لو حكيتها محتاجة كتاب مش بوست عالفيس فطالما الشغل بقي لازم يتدفعله..وطالما الشغل بقي بالشحاتة..يبقي بلاش احسن".

واستكمل: "انا طول عمري راضي الحمد لله.. بس حقيقي انا وصلت لمرحلة اكتئاب وصلتني اني بقيت بنام احلم بكابوس اني بقتل عيالي وبقتل نفسي لأني وصلت لمرحله نفسيه وماديه اني بقيت مش قادر اربيهم ولا اصرف عليهم وانا عندي تلات أطفال بعبدهم عباده متخيلين حجم المسؤولية..وبقيت مديون لطوب الأرض".

واستطرد: "حقيقي لو حد عنده فرصة سفر ليا هاكون شاكر ليه جدًا وهيكون جميل في رقبتي لحد ما اموت لأن حقيقي انا مش قادر أعيش في البلد دي تاني انا حاولت اسعي في أي مجال تاني بس ماقدرتش".

وأختتم "إدريس": وحقيقي لو اتعرض عليا بطولات بعد البوست ده هرفضها لان البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شيء..همسح ابلكيشن فيسبوك من تليفوني لأني هنزل ابيع تليفوني أصلا.. فانا هاكون متاح اونلاين لحد بالليل.. لو حد عنده فرصة شغل وسفر ليا ومش معاه رقمي ياريت يجيبه من اي حد.. ملحوظه: انا مش محتاج طبطبه من حد انا محتاج فرصة سفر وشغل تخليني اعيش ولادي حياه كريمه وبس......... شكرا ليكم محبتي للجميع هاين عليا اقوم ارمي نفسي من البلكونه بعد ماوصلت اني اكتب البوست ده".