سيمون: عانيت من الشائعات الغريبة.. وهذه نصيحة فاتن حمامة لي

كشفت الفنانة سيمون، معاناتها من الشائعات طيلة الفترة الماضية، مشيرة إلى أنها مرت بالكثير من المواقف الصعبة التي لم تفهمها في البداية.

وقالت سيمون خلال استضافتها في برنامج "معكم" الذي تقدمه الإعلامية منى الشاذلي، على قناة cbc: "مريت بشائعات غريبة، الوسط كان كله غريب عليا بكل الناس اللي فيه والطريقة بتاعتهم وأحيانا كان بيتقال حاجات مغلوطة".

وأضافت "من حسن الحظ أنني تقابلت مع الفنانة فاتن حمامة وفي أول فيلم ليا كانت حريصة تقول لي حاجات إنسانية كتير، وكانت بتفهمني وتنصحني ما ردش، لو حد قال عليا حاجة غلط وقالت لي استمري وما تخليش حد يعطلك، لكن أنا كنت بقول هيقولوا إيه يعني، وفعلًا حصل حاجات وافتكرتها".

وأكملت حديثها قائلة: "اكتشفت بعد كده أن أغلب الحاجات اللي يتحصل كانت مآرب ومصالح متعارضة، خاصة لما والدي مات وكأنه كان السند واتكسر ضهري بعده، قررت وقتها أبعد عن الفن وامشي، وفجأة في حاجة لمعت جوايا وقلت لما أعوز أسيبه أسيبه عشان أنا مش عاوزاه، لكن مش همشي عشان ناس ضايقتني، ومن وقتها قررت أبص للفن بطريقة مختلفة وده حصل سنة 1991".