نجوى فؤاد: "أنا أول راقصة تغطي بطنها وهي ترقص.. وأصلي يوميا في السيدة نفيسة

حلت الفنانة نجوي فؤاد ضيفة على برنامج "كلام الناس" الذي تقدمه الإعلامية ياسمين عز، على شاشة MBC مصر.

وقالت الفنانة نجوى فؤاد، إنها تحب الراقصة الاستعراضية دينا، لأنها ملهاش دعوة بحد، وتحب تتكلم عن الناس كلها حلو، ولها ستايل معين، بحد وصفها.

وتابعت "شايفة الأوكرانيات والأجنبيات بيرقصوا حلو، لكن لازم يبقى عليهم رقابة كبيرة.. لبسهم فاضح، كله مفتح وشبابيك".

وأضافت: "لازم حد يوجههم يلبسوا إزاي، لأنهم في بلد لها تقاليدها، عندهم الكلام ده عادي، لكن إحنا مش عادي.. أنا أول واحدة غطت بطنها وهي بترقص، أنا بصلي المغرب والعشاء في السيدة نفيسة كل يوم وساعات بفوت".

ومن جانب أخر تحدثت نجوي فؤاد عن الفنانة الراحلة دلال عبدالعزيز بكلمات مؤثرة، مؤكدة أنها كانت صديقة صدوقة، مضيفة: "كنت دايما ببعت لها رسايل الصبح على واتساب، وكان لها في حياتي كتير، ومكنتش حاسة بغربة في الوسط لما كانت عايشة.. ربنا يرحمها وسمير غانم ويخلي دنيا وإيمي، على اتصال بي دايما، وطلبت من كل واحدة فيهم تعزمنا على الفطار في يوم لوحده".

وأكدت: "دلال عبدالعزيز فاجأتنا بوفاتها، لم يكن أحد يتوقع ذلك، لكن نحمد الله دوما، وأتمنى من الله أن يتقبلها".

وأثنت على الراقصة فيفي عبده، قائلة: "هي كثيرة العطاء وزارتني، لكن بقت تقفل التليفونات بسبب وجع ضهرها، بحاول أتصل عليها ومبعرفش أوصلها، ودلوقتي ربنا يوفقها عندها شغل".