محمد رحيم يتهم صناع اعلان محمد منير والشاب خالد بسرقة لحن من احدى اغنياته

اتهم الملحن محمد رحيم، صناع الإعلان الدعائي لإحدى البنوك والذي قدمه عدد من المطربين على رأسهم الكينج محمد منير، والشاب خالد والمعروض على شاشات التلفزيون خلال شهر رمضان الجاري بسرقة اللحن الخاصة به من إحدى الأغنيات الخاصة به.

ونشر محمد رحيم مقطع فيديو عبر صفحته الشخصية بموقع التواصل الاجتماعي "فيس بوك" يتضمن مقطع من الإعلان ومقطع من اللحن الأصلي الخاص به.

وكتب "رحيم": " وكالعادة وزي ما أنا متعود كل سنة ألاقي في رمضان لحن من ألحاني نازل في أحد الإعلانات والمسلسلات دون استئذان أو تصريح مني أو من الشاعر والمرادي الضرر كبير جدا لأنه تم سرقه لحني ووضعه في واحد من أكبر الحملات الدعائية إعلان".

وأضاف: "الإعلان واللي بيغنيه قطبين كبيرين من أقطاب الأغنية العربية الفنان محمد منير والشاب خالد والغريبة أن النحت والاستخفاف بحقوق المؤلف والملحن خلا القائمين على العمل يقنعوا الشاب خالد يغني جملة اللحن اللي كنت عاملها للمطرب الكبير المنافس له (الشاب مامي) منذ سنة 2007 يعني من 15 سنة دون الرجوع ليا ولا لورثة الشاعر عبد العزيز عمار شاعر الأغنية الأصلية الله يرحمه وإزاي أنتوا مستخفين بالقضاء والقوانين كده".

وتابع: "إزاي أنتوا ناس مجردين من المهنية ومش بتحترموا ولا الجمهور ولا الزملاء؟؟ وإزاي أنتوا بتسرقوا الأعمال في وضح النهار ليستفيد بنك من بنوك الدولة مستخفين بحكومة نفس الدولة وكأنكوا واثقين ’ن مفيش حد هيعملكوا حاجة ولا حد هيعاقب اللي سرق واعتدى والله العظيم حرام مجهود السنين يترمي على الأرض كده قدام عنين الواحد وهو حي يرزق أيه الاستخفاف والاستهانة دي بالبلد وبقوانينها وقضائها".

واستطرد: "كنتوا هتخسروا أيه لما تفهموا بتوع بنك القاهرة أن أنتوا مستعملين ألحان من ناس مختلفة والألحان دي ليها أصحاب وكنتوا تواصلتوا بشكل محترف ومحترم علشان تحصل على تصريح قانوني باستعمال اللحن وتعفي نفسك من السرقة يا فنان ويا جهة الإنتاج وتعفي إدارة البنك من تهمة التعدي على أعمال الناس بالعكس كان هيبقى سلوك محترم واحترافي وأخلاقي!! ".

وواصل: "بس أنا واثق في ربنا سبحانه وتعالى ثم في القضاء المصري أنه هيرجعلي حقي وحق الشاعر المرحوم عبد العزيز عمار اللي بجد أولاده أولى بفلوس أبوهم اللي شوهتوا وحرفتوا كلمات أغنيته بعد ما رحل من 10سنين وزي ما أولاد كل حد فينا أولى بمجهود أباءهم اللي اجتهدوا وتعبوا علشان يعملوا أعمال ناجحة لسه بيتنحت فيها لحد النهاردة من أنصاف وأرباع الموهوبين والمشكلة الأكبر ان الملكية الفكرية دي بتشارك في الدخل القومي في كل بلاد العالم وبتؤثر في اقتصاديات الدول وكل العالم يعلم أهمية القوى الناعمة المصرية في شتى المجالات لكن للأسف فيه ناس لسه عايشة على سياسة القتل المعنوي والمادي للفنان والمبدع المصري حيا وميتا".

واختتم: "بعدين لما بتعملوا كده في أعمالي وأنا عضو محترف في جمعية SACEM الفرنسية ومعايا شهادة الاحتراف الدولية وعضو عامل في جمعية ساسيرو المصرية للمؤلفين والملحنين وعضو عامل في نقابة المهن الموسيقية وأعمالي واضحة واسمي معروف الحمد لله ومسيرتي 25 سنة أومال تعملوا ايه في الملحن والشاعر اللي لسه بيبتدي وبيقول يارب أكرمني".