بسبب قرار اعتزالها.. زيزي عادل تتصدر مؤشرات البحث في "جوجل"

تصدر اسم المطربة "زيزي عادل" تريند مؤشر محرك البحث الشهير "جوجل"، بأكثر من 10 الآلاف عملية بحث خلال الساعات الماضية وذلك بالتزامن مع قرار اعتزالها التي أصدرته أمس من خلال فيديو على صفحتها الرسمية على موقع تبادل الصور والفيديوهات "إنستجرام".

وقالت زيزي في الفيديو: " مساء الخير، أنا طالعة أقول خبر مهم جدًا أخدته في حياتي، ويمكن يكون أهم وأحلى خبر خدته في حياتي، هو قرار الاعتزال، قررت أسيب المهنة اللي أنا بشتغلها".

وتابعت قائلة: "يمكن القرار ده ما أخدتهوش إمبارح يعني، أخدته من فترة كبيرة، أنا مطلعتش أقولكم الخبر ده، لإني كنت حابة أتكلم مع نفسي ومع الناس القريبة مني جدا، والناس دي دعمتني جدا لما قولتلهم القرار ده، وشجعوني جدا إني أعمل كده، أنا ببعد عن أكتر حاجة من أكتر المغريات في الدنيا، اللي هى الشهرة وهبعد عن الشهرة والأضواء والفنانين ".

وأضافت: "الفترة اللي فاتت قربت من ربنا جدا، ولقيت القرآن بيقولي إني لازم أكون ملتزمة، لازم على قد ما أقدر أكون ملتزمة، ويمكن تكونوا مستغربين، إني طالعة بشعري ومش محجبة، ده لإن ربنا لسه ما أنعمش عليا بخطوة الحجاب، وبدعي ربنا إني ألبس الحجاب".

الجدير بالذكر أن آخر أعمال "زيزي عادل" الفنية كانت في العام الماضي وهي أغنية تحمل عنوان "خد هنا اقولك" من كلماتها وألحانها بالتعاون مع أحمد برازيلي.