عصام شعبان عبد الرحيم: "محمد رمضان بيقلد أبويا وبيلبس زيه.. وحمو بيكا حركاته مصطنعة"
تحدث عصام شعبان عبد الرحيم، عن رأيه في مطربي المهرجانات، ومنهم حمو بيكا، مشيرًا إلى أنهم يقلدون والده الراحل، ذلك خلال استضافته في برنامج "سابع سما" الذي تقدمه الإعلامية راغدة شلهوب، على قناة النهار.
وتابع: أي واحد نفسه ياكل عيش ويقلد أبويا؛ هشيله فوق دماغي وأسقف له، محمد رمضان بنفسه، اللي هو بطل، مش أي واحد يعني، بيلبس زي أبويا بالظبط".
وأشار إلى أنه حريص على ارتداء نفس استايل والده، قائلًا: “بلبس من أشرف فجلة اللي كان أبويا بيلبس من عنده، وكل العيال اللي موجودة، حمو وغيره، بيقلدوا أبويا”.
ولفت إلى أنه لا يشعر بالضيق من تقليد البعض لوالده، لكنه يستاء من اصطناع طريقة والده، قائلًا: "مش بيضايقني أي واحد بيقلده، بالعكس، هحترمه وأحبه، لكن مش بحب حد يصطنع التلقائية، أبويا كان طيب حقيقي، ما ينفعش واحد يعمل طيب ويشبهُه بأنه ابن أو حفيد شعبان، زي ما قالوا عن حمو بيكا؛ لأنه كان بيعمل شوية حركات مصطنعة، ويطلع بيها قدام الناس، لكن أنا أبويا مكانش بيصطنع أي حاجة.
وأكد عصام شعبان عبد الرحيم، أن والده الراحل، كان يستاء من الأسامي الغريبة للمطربين، قائلًا: أبويا لو جاله مطرب بيغني حلو أوي، واسمه وحش؛ ما يوافقش عليه، يعني ما يوافقش على واحد اسمه كزبرة، الأسامي اتغيرت، يعني لما أخلف بنت؛ اسميها: بدنجانة؟، المفروض الأسامي دي تتمسح.
