يسرا: "أحلام سعيدة" أصعب بكثير من المسلسلات الدرامية

قالت الفنانة يسرا، إن ظهورها الأخير في العمل الدرامي الذي جرى عرضه في رمضان "أحلام سعيدة"، كان كوميديا، وتراه كونه أصعب بكثير من المسلسلات الدرامية.

وأضافت يسرا، خلال استضافتها ببرنامج "كلمة أخيرة"، وتقدمه الإعلامية لميس الحديدي، المذاع على فضائية "ON": "علشان نلاقي موضوع يخليك تضحك دي مهمة جدا، ومهم جدا أن الكوميدي يكون في سياق، مش بس جملة ولا كلمة".

وتابعت: "أنا مكنتش قادرة أعمل دراما السنة دي، تعبت وكنت عايزه أضحك والناس تتبسط، ويبقي عندنا حالة مختلفة، ذوى الإعاقة البصرية الناس دي مش كئيبة.. الناس دي عارفه تعيش حياتها كويس، وشخصيتي في المسلسل كانت لشخصية ضريرة حاولت تتعايش مع عجزها ووجود الشخصيات اللي معاها ساعدها تعدي المحنة".

واستطردت: "وشخصيتي بالمسلسل مكنتش عايزه تبقي زي أمها وبتعاتب عليها أنها كانت ضعيفة ومش عايزه تكون مكانها هالة كانت أول مرة تكتب، ومكنتش متخيلة أنها هتقدر تعمل توليفة كبيرة بين الستات، وأنا قعدت مع المخرج واخترت معاه شخصيات الممثلات اللي ظهروا معايا، وفيه بينا وبين بعض كيميا مع وجود شيماء سيف لأنها بتضحك الكراسي".

وعن كواليس العمل قالت يسرا: "كانت كتافي بتتهز من الضحك أثناء التصوير بسبب شيماء سيف، وبالنسبة لشخصية ديدي اللي في المسلسل ففيه منها نماذج في حياتنا، أنا عندي 3 نماذج وبجد هما كدة ومش قاصدين وتركيبتهم كدة، ومنهم عندنا نماذج عظيمة زي عمار الشريعي وكان دمه خفيف والشيخ سيد مكاوي كان شربات الشرباته".