عبير صبري عن خطورة السوشيال ميديا: الشباب مش عارف يبقى سعيد.. ولازم الدولة تتدخل

أعربت الفنانة عبير صبري استياءها الشديد من السوشيال ميديا، خاصة بعد انتشار عدد من الجرائم مؤخرا، وذلك عبر فحتها الشخصية موقع تبادل الصور والفيديوهات "إنستجرام".

وكتبت عبير صبري عبر صفحتها الشخصية "الضغوط على الناس والشباب عالية جدًا، خصوصا على السوشيال الميديا الشريرة اللي بتوري صورة للناس على إنهم متميزين وبيرفكت من خلال صور مزيفة ومش حقيقية، وصور بالفلاتر وصور الأكل الفاخر والملابس الفاخرة والسفريات للمالديف وغيره والشنط الغالية والأجسام وعمليات النحت، وعايزة أبقى شبه فلان أو فلانة وعايز أبقى مشهور وخلاص".

وتابعت "حتي لو شهرتي قايمة على إني أتصور وخلاص واسمي اللي بعمله بلوجر، وده شيء بلا محتوى أو قيمة حقيقية وعايز تليفون زي اللي في إيد صاحبي وقرف كتير والشباب مش عارف يبقى سعيد لأنه عايز ساعة غالية وعربية غالية، ومبقاش حد بيدور على معنى السعادة الحقيقية، وكل الناس بتقلد بعض، أرجوكم السوشيال ميديا دي لازم يبقي ليها ظابط ورابط، لازم الدولة تتدخل، لازم يبقى فيه بوليس للسوشيال ميديا دي، ما يقدر على القدرة إلا ربنا يا جماعة".

وأختتمت حديثها قائلة "شاركوني آراءكم إيه السبب في الانتحار اللي شوفناه من شباب صغير لسه قدامه الحياة وجريمة قتل مرعبة لبنت مسكينة ملهاش ذنب، تفتكروا الشباب محبط كدة ليه، صدقوني كل الناس عندها مشاكل حتى لو مش بتظهر ده للناس وبيظهروا عكس كدة".