مصطفى كامل: "أبويا ميت على ايدي وراضي عني لكني تعرضت لعلقة موت على يديه"

تحدث الفنان مصطفى كامل، عن والده الراحل، وصفاته، وكيف أثرت تربيته له، مشيرًا إلى أنه تلقى منه علقة موت كادت أن تودي بحياته، وذلك خلال استضافته  في برنامج "على الترابيزة" الذي تم عرضة عبر قناة "الشمس".

وقال مصطفى كامل "أخدت تركيبة والدي في تربية ولادي أنا في بيتي وطقوس حياتي مش طقوس فنان، وبتعامل مع ولادي على أنهم حبايبي وصحابي".

وتابع "أبويا عمره ما وصاني علشان ما كنتش محتاج وصايا، وميت على إيدي وراضي عني، لكنه كان عنيف وصعب جدًا وصارم ومعندوش هزار، أوقات كنت بهزر مع أمي وأقول لها ليه بابا لما يطلع كنا بنجري ننام، لكن أنا مع ولادي أنا مش قاسي ولا بضرب.

مصطفى كامل: تعرضت لعلقة موت على يد والدي

وأكمل حديثة مضيفا: "كلت علقة في ثانوية عامة من أبويا كسر لي كل حاجة ما كنتش نافع بتعريفة من كتر ما ضربني جريت واستخبيت فوق السطح فضل يضرب فيا من أول فصل المدرسة وخدني الشارع كله ضرب لأنه كان متعمد يهني ويكسرني والناس كلها في الشارع كانوا بيقولوا يا عيني يا بني وفاكريني حرامي، وبليل قال لي جملة عمري ما هنساها، قال لي أنا مش مقصر ليه تطلعني صغير قدام عمامك لأن كلهم كانوا مناصب لكن العلقة دي غيرتني وبعد شهرين وقفت أبويا وأنا التاني عن المدرسة".

مصطفى كامل يعلق علي: 'أنا مش مختفي أنا تريند الفترة الأخيرة'

مصطفى كامل يبكي

ومن جانب أخر بكي مصطفي كامل علي الهواء وذلك بسبب تذكر والده، مضيفا "مراتي وصتني وقالت لي لو جت سيرة والدك ما تبكيش على الرغم من أنه متوفى من سنة 1996 لكن كل ما تيجي سيرته أقسم الله ما بإيدي بلاقي دموعي نزلت، والحمد لله إنه شاف 4 أو 5 سنين من قمة نجاحي".