كسول ويتمنى أن يموت وهو يجسد مشهد.. أسرار في حياة فتحي عبد الوهاب

حل الفنان فتحي عبد الوهاب في ضيافة برنامج "Abtalks الذي يقدمه الإعلامي الأماراتي أنس بوخش وذلك عبر قناته الرسمية على موقع الفيديوهات العالمي والشهير "يوتيوب".

وتحدث خلال اللقاء عن أمور تخص حياتها الشخصية وكشفت بعض الأسرار والكواليس بداخلها أيضًا، وكما عبر عن وجهة نظرها في أشياء مختلفة مما جعله يتصدر التريند عقب إذاعة الحلقة مباشرة. 

أمنية يتمناها فتحي عبد الوهاب قبل وفاته

تمنى فتحي عبد الوهاب أن تكون آخر جملها يقولها قبل وفاته هي جمله له في مشهد يؤديه حيث أنه قال: "نفسي آخر كلمات تبقي جملة في مشهد انا بعمله انا في مشهد بعمل مشهد يبقي دي آخر حاجا قولتها في حياتي"

رأي فتحي عبد الوهاب في الحب

كشف فتحي عبد الوهاب رأيه في الحب وقال: "الحب لازم يبقى بالعقل، بشوف أن ضمان استمراريته هو أنه يبقى بالعقل.. عشان كدا دايما لما نشوف علاقة مستمرة سنين طويلة بنقول إن فيهم شبه من بعض، هما عدوا فكرة الصداقة، بقوا أصدقاء بس عدوا الفكرة"

وتابع: "في كلمة حلوة كده بتتقال اسمها العشرة، العشرة دي فيها الحب والصداقة والمصير المشترك وكل الأمور، فيبقى شكل عقلي كبير، عشان كده دايما تلاقي الناس بيتكلموا عن شريكهم بالعقل مش بالعاطفة".

شئ يحبه فتحي عبد الوهاب في نفسه

عندما طرح عليه أنس سؤال عن شئ يحبه في نفسه أجاب مسرعًا:فتحي عبد الوهاب: فيا أنا ؟ أنا مفيش حاجة فيا مابحبهاش، معلش أنا متواضع أنت شايف.. بص من الحاجات القليلة جدا اللي ممكن أكون شايف أنها كويسة هي إني بعتقد أن أنا شخص مخلص، مخلص لأفكاري والفن، ورغم أن الأفكار بتتطور، والمبادىء بتتطور أو بتتعدل، بس القيم الكبرى أعتقد أني مخلص ليها زي الفن والأفكار المبدئية" 

فتحي عبد الوهاب يصف نفسه بالكسول والبائس

وصف فتحي عبد الوهاب نفسه بالكسول وقال: "لما أجي أتكلم عن نفسي لازم أسيطر جدا على الأنانية، لما تسأل عني هقول الحاجات اللي هي عيوب، بشوف إني بشكل ما متسرع، وبشكل ما حكمي بيبقى عاطفي مش عقلاني في أوقات مش المفروض أبقى فيها كده، وأنا شخص كسول جدا،بزهق بسرعة ومش دؤوب يمكن عشان مش متفائل، الحياة مش طول الوقت بمبي، ومعنديش فكرة الأمل، والسعي ورا أمل لازم يكون ليه حدود معينة.

فتحي عبد الوهاب: "ابني مش ملكي"

صرح الفنان فتحي عبد الوهاب عن رأيه في ملكية الآباء للأبناء وقال: "اللي يخليني أحس أن ليا قيمة في الحياة هو أي إنجاز أعمله لحد، وأني أسيب أفلام كويسة، أسيب حاجة تفضل في ذاكرة السينما، تخلي السلسال بتاعي يحترمني أو يحس أني كنت مخلص للفن.. أن كل الحاجات اللي كنت أحب أنها تبقى ليا أنا، اعملها مع ابني، أولها أن هو ابني لكنه مش ملكي، الأبناء مش ملكية خاصة للآباء والأمهات. 

فتحي عبد الوهاب يصف طفولته

تحدث فتحي عن طفولته وقال: "الطفولة يعني كانت عادية مفيهاش أحداث جسيمة أكتر من أنا كنت بعيش مع جدي وجدتي لأمي، لأن أنا اهلي دائمًا مسافرين ويمكن ده سبب في أن أنا مش طفل شقي لأن انت عايش طول الوقت مع ناس كبار، الناس اللي هي بتاخد القيلولة بتاعة الظهر، الناس اللي بيناموا بدري جدًا، مكنش في فرصة شقـاوة وبتاع لأن أنا كنت عايش معاهم لوحدي.

وأضاف: "و كان من أميز الحاجات اللي ممكن أعملها أن أنا أقرأ، بس كانت المشكلة إن الكتب دي بتاعة جدي 
ف وأنا عندي خمس ست سبع سنين كده كان في كتاب الغلاف بتاعه ملون، قعدت أحاول أقرأ فيه يمكن شهور كتير كملت فيه بس أربع ورقات وأنا مش فاهم منه حاجة بس لأنه الغلاف بتاعه مُلون،الكتاب ده كان اسمه (حرب الأيام الستة).

كما تحدث فتحي أن الفنان صلاح عبد الله هو من اكتشفه فنيًا وشجعه عليها رغم أنه لم يكن يريد ان يحترف به وكان يكتفي بها كهواية لكن صلاح عبد الله هو من طعله يحترف به كما صرح فتحي أنه لم يكن يضع خطط ليكون ممثل محترف.

آخر أعمال فتحي عبد الوهاب

يذكر أن آخر أعمال فتحي عبد الوهاب هو مسلسل "جزيرة غمام" والمسلسل من بطولة طارق لطفي، فتحى عبد الوهاب، مي عز الدين، أحمد أمين رياض الخولي، محمد جمعة، هبة عبد الغنى، هاجر الشرنوبى، ميار الغيطى، العمل من تأليف عبد الرحيم كمال وإخراج حسين المنباوى.
وتدور أحداث المسلسل حول الخلافات والصراعات بين عائلة شافع في جزيرة غمام بالإضافة إلى الصراع بين الخير والشر وتتوالى الأحداث في إطار درامي تشويقي.