علاء الأسطورة: "لما قعدت مع محمد رمضان استغربت هو ده اللي عامل الدوشة.. وتجربتي معاه بداية نجاح"

شاب متميز يبلغ من عمره الواحد والعشرين عام، يُقيم في شُبرا واشتهر بشكله المشابه للفنان محمد رمضان، لذا أطلق عليه الناس لقب شبيه محمد رمضان، حيث يشبهه في الشكل ولون البشرة وريأكشنات الوجه وشارك علاء مع الفنان محمد رمضان في كليبه الجديد "دوشة" الذي طرحته قناة روتانا منذ أيام على موقع "يوتيوب" وحقق الكليب انتشارا جماهيريا واسعا، وكان للفجر الفني حوار خاص ومميز معه.

 واليكم نص الحوار:

حدثنا عن تجربتك مع الفنان محمد رمضان في كليب دوشة ؟

تجربتي مع الفنان محمد رمضان دي تجربة أي حد يتمنى يكون متواجد فيها، وتجربة كنت مستنيها بقالي كتير جدا وكنت أتمنى إني أكون متواجد معاه في عمل والحمدلله ربنا كرمني وتواجدت معاه في الكليب، ودي بداية نجاح انك تدخل في عمل مع النجم محمد رمضان.

كيف جائت فكرة المشاركة في الكليب ؟ 

الإنتاج والاستايلست كلموني قبل الكليب بوقت قصير وروحت.

حدثنا عن شخصية الفنان محمد رمضان أثناء تصوير الكليب؟

محمد رمضان طيب جدا وبيهزر، وأثناء الشغل بيكون مركز في شغله ويدخل يراجع الشغل بتاعه ويطلع يعمله عشان العمل يطلع مميز، فـ هو ماشاء الله بيكون متقن في حتة العمل وكنا بنهزر مع بعض في التصوير عادي.

هل بتتعرض لانتقادات بسبب تشبهك بالفنان محمد رمضان ؟

أكيد لازم أقابل إنتقادات وبيقولولي انت بتتشبه بحد وبتاخد إسم حد بس هما مش فاهمين اللي فيها؛ لأني بعمل ڤيديوهات زيي زي أي Tictoker بس الفرق إني شبه محمد رمضان ودي حاجة بتاعة ربنا وأتشرف بيها.

وبماذا ترد على هذه الإنتقادات؟ 

أنا مببصش على الإنتقادات دي كتير ومش برد بنفس  الاسلوب اللي في التعليقات يعني مثلا الناس اللي بيهاجموني ويقولوا انت بتطلع على حس نجم، أحب أقولهم أنا علمت ڤيديوهات وجابت ڤيوهات عالية من أول ما بدأت وكده كده لو كانت جابت ڤيوهات قليلة كنت هفضل مكمل لأني حابب كده وحابب النجم نفسه، لكن في ناس تانية مصممة تقولي إعمل شخصية لنفسك، طب ما أنا بعمل شخصية لنفسي ! وأنا علاء عادي وفي الميديا إسم علاء الأسطورة هما الناس اللي لقبتني بـ كده من بدري ف هو الفكرة أن أنا مش زي ما الناس بتقول في الانتقادات وفكرة تقليدي للنجم محمد رمضان وريأكشناتي اللي زيه،  عندي موهبة في التقليد وعشان الناس تفاعلت مع الڤيديوهات وحبتها ومحمد رمضان كان بيقعد يعمل شير للفيديوهات فـ ده شجعني أكتر وعشان هو يشوفها بس مش أكتر.

ما الذي بيعجبك في الفنان محمد رمضان؟

بيعجبني في شخصية النجم محمد رمضان كارزميته سواء كـ ممثل أوبيغني أوبيعمل مسرحيات، أما الشبه دي حاجة بتاعة ربنا وبكون مبسوط وأنا بعمل الڤيديوهات الصغيرة والمشاهد بعملها عادي بس كده كده كان في دماغي اني ادخل معاه في عمل واهو حصل.

وما الرسالة التي تود أن توجهها للفنان محمد رمضان ؟

أحب أقول للفنان محمد رمضان ربنا ينجحك كمان وكمان وكلمة هو متعود عليها "ثقة في الله نجاح" دي مبدأ جميل منه  وماشاء الله هو في نجاح وده مبدأ جميل منه وهو متقن في عمله وبيطلع للناس حاجات حلوة وجميلة ومش فارق معاه الناس اللي بتهاجمه وهو اصلا شخصيته عكس كل الكلام اللي بيتقال عنه كأنك قاعد مع حد صاحبك، حد جدع، وحد طيب ومحترم وغير كل اللي بيتقال زي ما بيقولوا "انت سامع دوشة برا  وتروح تقعد مع صاحب الدوشة" تستغرب هو ده اللي عامل الدوشة ؟! ومشوفناش منه أي غرور ولا تناكة.

هل تعتبر مجال التمثيل مستقبل أم هواية ؟ 

مجال التمثيل ده حاجة كنت مُنتظرها من بدري فـ باذن الله.

من أكبر داعم لك؟

ليا صديق إسمه شناوي، وأسرتي، وبعد كده أصدقائي.