نجم التسعينات حسن فؤاد: "المطربين حاليًا موهبتهم على قدها.. وطريقة أحمد سعد في الغناء مبتريحنيش"
حل المطرب حسن فؤاد، ضيفًا على برنامج "عيش سعيد "، على قناة Etc tv والذي يقدمة كلًا من: إيهاب صالح، لينا صالح، وسها رضا، من الخميس للأحد الساعة الثالثة عصرًا، حيث تحدث عن العديد من الأصوات ونجوم الفن.
وأضاف: "كل اللي موجودين دلوقتي موهبتهم على قدها.. مين في الساحة اقول عليه مطرب واحطه جنب على الحجار، وجنب محمد الحلو، بإستثناء بهاء سلطان".
رأيه في أحمد سعد
وعن أحمد سعد، قال: "فيه معاه وفيه ضده ليه طريقة غنا كدا ممكن متريحنيش انا شخصيا بس تريحك أنت".
تترات المسلسلات
وتابع: "لما تجيب حد وتحطه في غنوة درامية بالذات مش اي حد هيعرف يقولها بدليل ايام ما انا طلعت مكنش حد يجرأ يمشي جنب محمد الحلو، وعلى الحجار، لما انا دخلت بقى في سيل دخل بعدي هشام عباس، وخالد عجاج، كله دخل لان البرواز اتفتح ".
وتابع قائلا: "لأن عبقريتها في التعبير والأداء دلوقتي يقولك ده مطرب حلو، زمان كان يقولك ده حسه حلو".
حسن فؤاد: بهاء سلطان من أهم المطربين الحاليين
وأضاف: "بالنسبة لي اهم المطربين الموجودين بهاء سلطان، وبتعجبني اختيارات تامر عاشور، جدًا، محمد محي، ملك الإحساس في حته فأصوات الحلوة معدودة الأصوات اللي تعيشك في حته تانية والأصوات اللي تنقلك في حالة وتقولي عليها الله اي الجمال ده، ولكن مش كُتار".
رأيه في شيرين عبد الوهاب وآمال ماهر
واكمل: "شيرين طبعًا وامال ماهر، امال ماهر، دي اتولدت على ايدي انا وعمار، الله يرحمك يا حبيبي، كانت بتلعب على الأرض كانت صغيرة جدًا، عمار قالي تعال اسمعك حاجة".
وأضاف: "كان عمار مسجل لها اغاني لأم كلثوم، قالي هسمعك صوت لسه هنقدمه الفترة الجاية، فسمعني قلت له اي ده، مفيش حد يغني زيها غير ام كلثوم".
وتابع:" قالي يا حسن البنت تقف أدام الميكرفون بتحول تبقى حد تاني، وطبعًا أنغام وجمالها، بس لما تقول معلم غنا يبقى امال ماهر، أخطبوط صوت مرعب، صوتها متمكن وتقدر تقول كل الألوان".
نبذة عن حسن فؤاد
حسن فؤاد، هو أحد المطربين الذين اختفوا عن الساحة الفنية في السنوات الاخيرة
غني في تترات المسلسلات منهم: مسلسل" أرابيسك"، مسلسل" الوتد"، أيضًا شارك في التمثيل، أيضًا شارك في أوبريت "اخترناك".
برنامج "عيش سعيد" تقديم إيهاب صالح، لينا صالح وسها رضا ورئيس تحرير البرنامج ندي إمام ومسئول القسم الفني بالبرنامج يارا احمد وإخراج علي سعودي.
