"لازم يتعالج نفسيًا".. أبرز التصريحات النارية من فاروق فلوكس ضد محمد رمضان بعد تصدر الأول التريند

أعرب الفنان القدير فاروق فلوكس عن استيائه من سخرية محمد رمضان لتجسيده الأول لشخصية صبي العالمة في فيلم "الراقصة والسياسي".
 

 
وقال فلوكس في تصريحات صحفية له: “أعتقد أنه شافني في الدور وهو صغير، ولكن مكانش يقدر يقول الكلام ده قبل ما يجيله الملايين اللي بيكسبها دلوقتي، وبقا بيتكلم بفلوسه مش بلسانه، وأنا مش زعلان من كلامه”.

فاروق فلوكس يهاجم محمد رمضان

وأضاف: "زي ما هو ميقبلش يعمل دور صبي عالمة أنا كمان لا أقبل تجسيد شخصية بلطجي أو واد صايع بسكينة في الشارع، لأن أعماله مسيئة للفن المصري والشباب، وهو دخل في حتة مش بتاعته، لإنه هاجم فريد شوقي، فهل المنطقي كل واحد ياخد كام مليون ييجي يهاجم الكبار.

فاروق فلوكس يكشف عن أدوار مهمة له

كما قال فاروق فلوكس في تصريحات صحفية أخرى: "أنا ماعملتش دور صبي الرقاصة فقط، أنا عملت أدوار تانية مهمة، وكتير فالجيل الحالي يتمنوا يقدمو نفس الأدوار دي، وده لأهميتها، مشيرًا: عملت دموع في عين وقحه، بطولة عادل إمام، ودي لغة الفن اللي مابتمشيش بنوعية واحدة، جميع أدواري اللي قدمتها على مدار مشواري الفني بقدم شخصيات مختلفة، وهي دي اللي الناس بتصدقها.

فاروق فلوكس يطالب بعلاج محمد رمضان نفسيًا

وعن مهاجمة محمد رمضان للفنان القدير الراحل فريد شوقي، قال فلوكس: محمد رمضان ممثل كويس ماقولناش حاجة، بس لازم يروح يعالج نفسه عند دكتور نفسي.

واستكمل: “كون أنه دايمًا بيقارن نفسه بالكبار، وبيقلل من قيمتهم الفنية والشخصية، وهو لسه مهما كان مابقالوش كتير في الساحة الفنية، يدل على أنه غير سوي، وأنه من الشخصيات الحقودة دائما على الأنجح منه، وهو شاء أو أبى فهو جنب فريد شوقي وغيره من زمن الفن الجميل فنان صغير جدًا طبعًا”.

وأضاف فاروق فلوكس: "اللي يعيش عصر فريد شوقي هيعرف أن مكنش في شباب بيمسك السلاح في أيده وهو رايح الفرح، ولا كان فيه شباب بتقتل عشان المخدرات، زمان كل الشباب رجالة بجد عشان كان فيه حاجة اسمها حرب، وهو طبعا استحالة هايفهم حاجة زي كده.

وأردف حديثه قائلًا: "فريد شوقي كان الملك في المجال ولازال الملك، لكن أنت بقا ملك ايه.. ملك الحواري للشوارع والعيال البايظة، ولا ملك المهرجانات والإسفاف، لا بد من معالجة محمد رمضان نفسيًا مع احترامي ليه وهو ممثل شاطر".

وقام فلوكس بتوجيه نصيحة لمحمد رمضان قائلًا: أرجو منك متهاجمش القمم القديمة ولا الحديثة، عمر حد مننا طلع قال أنا نمبر واحد في العالم، ليه يا محمد يابني ده من تواضع لله رفعه.

رد أحمد فلوكس على تصريحات محمد رمضان

وكان الفنان محمد رمضان قام بمهاجمة الفنان فاروق فلوكس، خلال لقائه الإعلامية نجوى إبراهيم المذاع على قناة النهار، وقال: "فيه فنان كبير عمل أشياء أرفض أن أفعلها، عمل أدوار صبي عالمة ولو هشحت مش هبقى زيه ولا هاقدم الأدوار دي.

وقام أمس الفنان أحمد فلوكس بالرد عليه بعد هجومه، وقال له: “أنت طبعا هترفض دور صبي الرقاصة عشان انت نمبر 1 وعينك على دور الرقاصة نفسها، وفعلا أنت أخلاقك أخلاق صبي رقاصة”.

وجاء رد فاروق فلوكس بناء على لقاء محمد رمضان مع نجوى إبراهيم المذاع على قناة النهار، قائلًا: “فيه فنان كبير عمل أشياء أرفض أن أفعلها، وكان بيعمل أدوار صبي عالمة ولو هشحت مش هبقى زيه، رغم أن هذا الفنان قدير”.