عفاف شعيب عن عدم تكريمها في "القاهرة للدراما": "عندي شهادات مش عارفة أحطها فين"

علقت الفنانة عفاف شعيب على عدم تكريمها في مهرجان الدراما قائلة: “مش أنا إلى زعلت على عدم التكريم  بس الناس اللي هتزعل.. فيه ناس اتصورت معايا وقالوا لي أنتي اصل الدراما العربية ولم يتم تكريمك ولكن التكريم من الله”.

عفاف شعيب: تمنيت تكريم هذه الأسماء 

وأضافت في تصريحات تلفزيونية: "مش أنا بس اللي متكرمتش يعني كفاية أن الفنان الكبير رشوان توفيق لم يدعى ولا عفاف رشاد والمفروض كل ذي حق يأخذ حقه فيه ناس كتيرة كانت تستحق وناس لا تستحق  وفيه ظلم بين ولكن أنا شخصيًا  مش محتاجه التكريم واتكرمت كتير.. وعندي شهادات مش عارفة أحطها فين لكن زعلي على الفنانين الاخرين فين كمال ابو رية وأحمد عبد العزيز".

الجدل حول شراء ملابسها من الخارج

في سياق آخر وحول الجدل بسبب جلب ملابسها من الخارج قالت: "معلش مش عاوزة حد يزعل مافيش مقاس في الصناعة المصرية  مظبوط في المقاسات أنا بقيت بلف مصر كلها عشان اجيب بلوزة أو جاكت أو بنطلون وبجيب من محل بيجيب ملابس ألماني وهو الوحيد المظبوط، ولبسي شيك ومحترم، مبلاقيش البدل اللي أنا عايزاها إلا في الملابس الألمانية، هما عاوزني أمشي مجربعة ولا إيه".

تعليقها على التحقيق مع مروج شائعة وفاتها

وانتقدت الفنانة عفاف شعيب، في أول تعليق لها على التحقيق مع مروج شائعة وفاتها على مواقع التواصل الاجتماعي  قائلة:  "على مدار ثلاث سنوات  يطلقون الشائعات بوفاتي وهذه الشائعات ليست قاصرة علي فقط فمن قبل ظهرت شائعات على ميرفت امين والراحل  هشام سليم  تخرج عنه الشائعات منذ عام والزعيم عادل إمام.

وتابعت: "اشمعنا الجيل بتاعنا القديم تطلع عليه الشائعات وهي أفكار شيطانية وناس فاضية  والموت والحياة بإيد ربنا كلنا هننتقل محدش هيخلد فيها بس ليه كده؟".

رد فعل عفاف شعيب على شائعة وفاتها

واصلت: "الدنيا إتقلبت بعد الشائعة والناس قعدت تكلمني وتبعتلي وتقلي إنتي بخير ؟ لان الشائعة إتعملت بكل تفاصيلها وأن الجنازة تخرجت.. ربنا يسامحهم  ودول ناس قاعدة للساقطة واللقطة ".

مطالبتها بالتحقيق مع مروج شائعة وفاتها

ولفتت إلى أنها هاتفت نقيب المهن التمثيلية  الدكتور أشرف زكي واخبرته بضرورة التحرك ووكل محامي النقابة  باتخاذ الاجراءات القانونية لأن الموضوع  معدش يتكست عليه".

وأوضحت أن المجتمع  بات في تعامله  أكثر قسوة قائلة: "فيه ناس لسه الخير فيهم وكويسين ومحترمين بس القسوة والشراسة زادت مش بس كده ده فين ناس بتتكلم أني محجبة وبشتغل بقوة وأنا هدخل الفردوس الاعلى  بالشائعات دي".