خاص.. إيساف لـ "الفجر الفني": أفضل العمل أكثر مع فناني جيلي.. أستمع لـ بهاء سلطان ومدحت صالح.. وهذه أعمالي الجديدة
صرح الفنان إيساف، بأنه يفضل العمل أكثر مع فناني جيله قائلًا: "أنا بفضل أشتغل مع الفنان أيًا كان.. بس طبعًا أكيد القدام اللي هما من نفس جيلي بنكون فاهمين بعض أكثر وإحساسنا قريب من بعض ف عشان كدة بحب أشتغل معاهم أكثر".
وأضاف في تصريحه لـ “الفجر الفني”: "بس ده ميمنعش إني بسمع كل الناس ولما بلاقي عمل جديد مع فنان من الجداد سواء شاعر أو ملحن أو موزع طبعًا بعملها. لأن الفن فيه تطور وفي أجيال.. وكل جيل بيطلع بفنه الخاص به".
وتابع: "بس رأي أنا ك "إيساف" أنا أحب أشتغل أكثر مع فنانين جيلي، لكن لو هعوز أواكب الجيل ده ف هضطر إني أسمع من كل الناس وهختار الحاجة اللي هحسها.. وهشتغل مع الجيل الجديد وكل الفنانين الجداد سواء شاعر أو ملحن أو موزع بس شرط أكون حاسس الحاجة اللي هقدمها".
إيساف: بحب أسمع بهاء سلطان ومدحت صالح وأحمد سعد
وكشف أسماء الفنانين الذي يسمعهم بإستمرار قائلًا: "أنا بحب أسمع بهاء سلطان، وأمد سعد، ولؤي، وآمال ماهر، وأنغام، وشيرين.. وأيضًا بحب أسمع الأغاني القديمة للفنان الكبير جورج وسوف وبحب مدحت صالح جدًا".
و تابع: "دائمًا بحب أسمع أنواع الأغاني الكلاسيك.. اللي هو النوع اللي بقدمه وبغنيه طول عمري، ده نوع الأغاني اللي بحبه عادةً".
أعمال الفنان إيساف القادمة
وفي سياق مشابه كشف إيساف لـ "الفجر الفني" عن أعماله الغنائية القادمة قائلًا: " في أغنية (في حلاوة كده) هتنزل خلال الأيام د.. وفي بعدها كمان أغنية نفس نوع الأغاني السريعة المبهجة، بس لسه مش عارف هتنزل علطول بعد أغنية في حلاوة كدة أو هستني شوية.. وممكن أفصل بينهم بأغنية دراما".
و أضاف: "بحضر كمان لأغنية سريعة ومبهجة اسمها "مش رايح الشغل" دي عاملها للموظفين اللي زعلانين من المديرين بتوعهم، والأغنية متصورة فيديو كليب بطريقة كوميدية".
