سهير جودة: الرجل دموعة صادقة ومش سهل يعيط
قالت الإعلامية سهير جودة خلال برنامجها الذي يحمل اسم "الستات"، والمذاع عبر فضائية "النهار"، قائلة: "كمان الرجل قليل البكاء، ومش بالساهل يعيط، وده بسبب أن القنوات الدمعية عنده أقل من الست، عشان كده دموع الرجل صادقة، لأنها فعل غير مسبوق، لكن في رجالة لو عيطوا بيبقوا بيمثلوا، الرجل مبيعيطش بسهولة، لكن اللي بيعيط للإستفزاز دي بتكون دموع التماسيح".
وتابعت سهير: "الصمت كمان من أسلحة الرجل، والست متعرفش تفسيرها، وتلاقي دايما الرجل بيلجأ للصمت بعد أي جرح عاطفي من أجل التعافي، لأن طبيعته غير الست هي بتحب تفضفض أو تعيط، الرجل بيبقى مرتبك مش عارف يفكر فبيدور على طرق يخرج بيها من أزمته، والست بتقدر تستعيد توازنها أسرع من الرجل".
كما حرصت الإعلامية سهير جودة، على التعليق على سلوكيات الرجل المختلفة والغير مألوفة لعدد كبير، ومنها اهتمامه الشديد بسيارته، قائلة: " العلماء أكدوا أن الرجل يعتبر السيارة امتددا لنفسه، لذلك الرجال يعشقون سياراتهم أكثر من الستات، ويعتبرون العربية كائن حساس جدا، ويتعاملون معها برفق، وبينضفها ويهتم بيها، اكتر من اهتمامه بالست، ممكن ده يكون بسبب أن العربية مبتشتكيش فبيتعامل معاها بحساسية، لكن الست بتشتكي دايما، فنتمنى يكون عنده رحمة وإنسانية في كل المواقف".
واختتمت سهير حديثها: "فكرة الذكورة عند الرجل متمثلة في ثلاثة أشياء هي؛ هيمنة ومنافسة، ومخاطرة، فمشاهدته للرياضات العنيفة بمثابة مساحة ان يسير مع هذه القيم والتوحد معها"
وعلى سبيل المثال تعلق الرجل برياضة كرة القدم، هو يشعر خلال متابعتها بالسعادة والبطولة كأنه صاحب الإنجاز، عشان كدة مش لازم الستات تزعل أن الرجالة بتنشغل بالكورة، لأن الكورة هي بتعمله توازن نفسي، حتى لو فريقه مكسبش هي كمان بتعمله علاقة جماعية مع الناس من خلال تبادل الآراء والمناقشات، ودي حياة هو محتاجها، ولازم الستات تفهم ده ومتغضبش وتكره كرة القدم، بل تحاول أنها تشاركه في هوايته".
