أتاخدت على خوانة.. أبرز تصريحات شيرين في أول ظهور لها عقب أزمتها
في أول ظهور إعلامي لها بعد أزمتها الأخيرة ودخولها إلى المستشفى، خرجت الفنانة شيرين عبد الوهاب عن صمتها في مداخلة هاتفية لبرنامج الحكاية الذي يقدمه الإعلامي عمرو أديب عبر قناة Mbc مصر، لتروي تفاصيل تلك الأزمة وفترة مكوثها في المستشفى، وتصدرت شيرين عبد الوهاب تريند محرك البحث جوجل عقب مكالمتها.
أبرز تصريحات شيرين عبد الوهاب
بدأت شيرين حديثها تطمئن جمهورها بإنها بخير وأفضل حال، حيث قالت: أنا زي البومب وحلوة خالص، وأنا سعيدة بيكوا وبتدفى بيكوا وبحبكوا ليا، وأنا كويسة ولسه بخضع لعلاجي النفسي لكني أنا بقيت كويسة جدًا جدًا.
- أنا ممتنة جدًا للناس، إنتوا تعبتوا فيا وتعبتوا عشاني وأنا عمري ما أخذلكم أبدًا.
-بشكر كل اللي قال كلمة حلوة وبشكر اللي قال كلمة وحشة وممكن يكون مضايق عشاني أو عليا فأنا هقوله شكرًا لحبك وإهتمامك.
-كانت أيام صعبة عشان أتاخدت على خوانة، حاجة أنا إستغربتلها، ولما صحيت تاني يوم في المستشفى قولت لنفسي انا قاعدة في مكان أمين جدًا وكل الناس اللي فيه بتحبني وخايفين عليا.
-كنت باكل أحسن أكل وبنام أحسن نومة، ايه المانع أن انا مستفادتش باللحظات الحلوة هنا وان انا ارتاح شوية.
-الحقيقة بشكر محمد السيد عبد الوهاب بشكره إنه عرفني بالمستشفى والناس المحترمين دول وراعوني وانهم احسن حاجة فالدنيا.
- انا بشكر صحافة بلدي، بشكر صحافة الوطن العربي كله، بشكر الأقلام اللي كتبت حلو واللي جرحت.
- انا هتنازل عن اى حاجة كنت عاملاها لمحمد سيد عبد الوهاب، لاني مقدرش اعمل كده، وانا شيرين اللي قلبها متسامح، وأنا بتنازل عن حقي في كل حاجة حصلت معايا
- تم بمشيئة رب العالمين كتب كتابي على السيد حسام حبيب.
-عايزة أقول للناس أدعولي لأني مقدرش أعيش من غير دعواتكم ليا ورضاكم عليا.
- كتبنا الكتاب أمبارح الساعة ٩ بليل بحضور الناس المقربين جدًا لينا وأنا بطمن الناس عليا.
-بعتذر لحسام عن كلام صدر مني، وعايزة أقفل صفحة حياتي الخاصة مع الناس لأني كنت السبب في أن الحياة دي اتفتحت عليهم وانشغلوا بيا في وسط مشاغلهم.
-أنا في عصمة راجل طيب جدا وحميني من البداية، وكان معمولنا حاجة كبيرة أو ي وكنا ضحية حاجة كبيرة وربنا فكها بسلام.
-إحنا مش معصومين من الغلط، وأنا غلطت لما طلعت أتكلمت بصوت عالي، أنا شيرين تربيتكوا، وانا غلطانة اني عملت ده في العلن بس الحقيقة ان كل حاجة كانت في العلن.
-أنا زعلي كان في العلن وحبي كان في العلن وكتب كتابي الأولاني كان في العلن وكل حياتي هتبقى في العلن، أنا مستاهلش أعيش في ضلمة وأعيش خايفة عشان أي حاجة.
- حبي من الأول لحسام كان على المشاعر، وأكيد لسه بحبه وأنا معرفش أحب بسهولة وأسيب بسهولة، وده حب حياتي، وأنا بوعد الناس أني أنا في أمان عشان انا وسطكوا، وكل الناس دايما هتبقى ضهر وحما ليا، وحسام طيب جدا وعيلته ناس طيبين
-حسام اللي أقنعني وقالي هنرجع دلوقتي.
-عايزة أشكر نضال الأحمدية، وباركتلنا وأحتفظت بالسر، ومكنتش عارفة حاجة.
-بشكر كل الناس وتناموا مرتاحين إنهاردة ومبسوطين ومطمنين عليا.
