جلال فهمي يكشف لـ "الفجر الفني" رأيه في اختلاف المزيكا عن سابقًا.. ويعلن عن أعماله المرتقبة (خاص)
كشف الموزع الموسيقي ومهندس الصوت "جلال فهمي" عن أقرب الأغاني له التي قام بتوزيعها، وأيضًا كواليس عمله مع الفنانين، كما أوضح رأيه عن المزيكا حاليًا عن سابقا إضافة إلى إعلانه عن أعماله المرتقبة.
وأضاف جلال فهمي، في تصريح خاص لـ "الفجر الفني": "أنا اشتغلت مع فنانين كتير غير تامر حسني، بس يعني حجم الشغل بتاعي معاهم مش كثير زي نجم الجيل".
وأضاف: "تامر حسني في شغله معندوش الوقت الكافي الفاضي اللي يخليني أنا ينفع كمان يبقي عندي وقت فاضي عشان أنشغل مع فنان تاني".
وتابع: "كل الفنانين صحابي وحبايبي وبتمني وبتشرف أن أنا اشتغل مع كل الناس أكيد".
وأوضح رأيه في اختلاف المزيكا حاليًا عن سابقًا قائلًا: "المزيكا اختلفت بنسبة 180 درجه عن زمان، زي ما احنا كمان كان جيلنا فيه المزيكا اللي قبلنا كان جيل العظماء جيل عبد الحليم وعبد الوهاب ومحمد فوزي وفريد الأطرش وأم كلثوم".
وأضاف: "إحنا أكيد كنا بالنسبالهم مزيكا جديدة فكل مزيكا بتيجي ليها الطابع الخاص بيها".
وعن أقرب الأغاني التي وزعها إلى قلبه قال:"أي أغنية وزعتها هي قريبة لقلبي ومعنديش تراك مفضل يعني كل فترة بقعد أنقل وأشغل الأغاني بتاعتي".
وعن الأغاني التي وزعها ولم تأخذ حقها قائلًا: "قصة أن أغنية وزعتها وماخدتش حقها دي مش قادر أحدد من أنهي منظور، لكن ماخدتش حقها في الإنتاج الموسيقي مثلًا فمفيش".
وكشف لـ "الفجر الفني" عن أعماله المرتقبة قائلًا: "إن شاء الله بإذن الله في كذا حاجة طبعًا شاغلين في الألبوم الجديد بتاع تامر حسني أن شاء الله والفيلم الجديد بتاع تامر حسني، وأنا عندي المشروع الخاص بيا شركة الإنتاج بتاعتي في موهبتين بقدمهم 2 بنات أن شاء الله يكسروا الدنيا، في فعلا نزلت تسنيم العايدي قبل كدة وفي بنت تانية مصرية كندية أن شاء الله نعمل حاجة جامدة مع بعض".
