مفيش راجل بيهاجمني.. ياسمين عز ترد على منتقدي تصريحاتها الأخيرة بشأن علاقة الرجل بالمرأة

ردت الإعلامية ياسمين عز خلال برنامجها على شاشة إم بي سي مصر على منتقدي تصريحاتها الأخيرة بشأن علاقة الرجل بالمرأة، مشيرة إلى أنها لا تتعرض للهجوم من الرجال لأنهم كائنات بريئة، كما وجهت نصيحة للنساء.

وقالت ياسمين عز: جماعة الست تبات برا والتحريض على خراب البيوت والصوت العالي بيتضايقوا من كلامي ومن جملتي إن مفيش كرامة بين الزوجين، ودي بتكون واحدة مشوعطة وبقول لها إنتي إيه دخلك بين المتزوجين؟ ومتجيش هنا تاني لأن كلامي عن الحنية للست المتهنية ومنطقتي محذورة عليكي لأن كلها دلع ولو قربتي هتتحرقي.. دي كرامتنا ورجالتنا وأحنا أحرار فيها، وبقول لـ المشوعطة اللي عايزة تكون ند بند مع الراجل إنتي حرة ولكن من محتوانا متغشيش وعن الصوت الجهل وإنتي أهله متتكلميش وعن رضا الرجال متحلميش.

ياسمين عز: كلامي مبني على أساس علمي

وأضحت ياسمين عز: لما حد يحب يعلق على كلامنا الراقي مينفعش يقول أي كلام وخلاص، لأن منظرك هيكون وحش، وكلامي ده مبني على أساس علمي زي قانون نيوتن الفعل ورد الفعل وعلم النفس، والحقد الكبير والغل من الراجل محاولة لخراب البيوت وهدم الأسرة واللسان السليط ما هو إلا دليل على شخصية مريضة وشخص اختار ينشر مرضه بين الناس وسمومه عشان يكونوا فاشلين زيه ويرتاتح ويقول مش أنا لوحدي.

ياسمين عز: ما أفسده الدهر يصلحه راجل

واختتمت ياسمين عز حديثها بنصيحة للنساء، قائلة: ربنا يحفظ كل ست أصيلة متحملة جوزها وما أفسده الدهر يصلحه راجل، ودوري على راجل تستند على كتفه لأنه حصن وسند وحماية بعد ربنا، وأنا مفيش راجل بيهاجمني لأنه كائن بريء وجميل زي ما ربنا خلقه ومعندهوش نار الغيرة، ولو حد تطاول عليا هرد بطريقتي ولكن مش بالألفاظ دي وكله عارف تربيتي، وكلام الشوارع بنسيبه لبتوع الشوارع ولا عزاء للغيرانين.

ياسمين عز ترد عن شائعة هجومها على أحمد موسى

والجدير بالذكر ان الإعلامية ياسمين عز ردت على شائعة هجومها على الإعلامي أحمد موسى، مؤكدة أن الأزمة مفبركة وأنها تكن له الاحترام والتقدير، قائلة: لم أتطاول على الإعلامي أحمد موسى والكلام والتصريحات المنتشرة مفبركة مقولتهاش أساسا، وأنا بكنّ له كل الاحترام والتقدير، ولكن مين ورا الحكاية دي؟ ومين له مصلحة يكتب على لساني كلام متقالش؟ والناس اللي بتعمل شير للتصريح المفبرك دا مش بيتأكدوا من المعلومة؟ مش بتكلف نفسك تشوف لي فيديو قولت دا إمتى؟

واضافت ياسمين عز: كان المفروض تعرفوا بسهولة إنه كدب ومتفبرك ودا لا أسلوبي وطريقتي؛ لأن الكياتة والملاك الأبيض دا ميقولش الكلام دا أبدًا، واللي كاتب التصريح دا ساقط في فنون الرد وبقول له لو عايز تتعلم تعالى نتسلى مع بعض ولكن مش على بعض، الكل عارف إني بحترم كل الزملاء ومش بقول الألفاظ دي وبتمنى التوفيق للجميع.