كلاكيت تاني مرة.. ياسمين عز توجه رسالة حادة لكريستيانو رونالدو فماذا قالت؟

أكدت الإعلامية ياسمين عز، مقدمة برنامج "كلام الناس" على قناة MBC مصر، ضرورة زواج كريستيانو رونالدو الاعب البرتغالي قائد منتخب البرتغالي من صديقته جورجينا رودريجز للمرة الثانية، بهدف ستر فتاة من علاقة غير مشروعة، بحد قولها.

وأكدت ياسمين عز أن كريستيانو رونالدو يخشى الزواج من جورجينا رودريجز بسبب خوفه من حصولها على نصف ثروته في حال وقوع الطلاق.

ياسمين عز: كريستيانو مايعملش حاجة أمه مش راضية عليها

وتابعت: "كريستيانو مايعملش حاجة أمه مش راضية عليها، وأمه عندها مشاكل في الموضوع ده، بتحبها، بس تيجي عند عقد الجواز وموقفة الموضوع".

واستكملت ياسمين عز حديثها قائلة: "يقدر يقول لها يا أمي غصب عنك هروح أتجوزها، مايحصلش، حياتهم بقى وهم دنيتهم بتوع بره مالناش دعوة بهم، وبقول الكلام ده للي بيقولوا لي ما هي مراته وأم عياله، حبيبتي مفيش عقد زواج، دخلتيني في تفاصيل مش عايزة أتكلم فيها أصلا".

ياسمين عز لـ كريستيانو: الحلال مفيش أحلى منه

وأضافت: "أنا دعيت دعوة للستر والجواز والرسالة الكويسة، وبكرر رسالتي مرة تانية لكريستيانو رونالدو الحلال مفيش أحلى منه، وربنا عمره ما هيكرمك طول ما أنت مجريها وراك، وأديك شفت ميسي لما أتجوز وأستقر ربنا كرمه إزاي، وصل للنهائي أهو وعمل أحسن بطولة في حياته وهو عمره 35 سنة، لا أتخانق مع مدربه في النادي ولا المنتخب، وعمال يكسر في أرقام قياسية".

ياسمين عز: مرة تانية يا كريستيانو، البنت خلي بالك منها

واختتمت ياسمين عز: "مرة تانية يا كريستيانو، البنت خلي بالك منها، وربنا يصلح لكم الحال ويروق لكم البال ويرزقكم بالمال ويهدي لك جورجينا أم العيال".

ياسمين عز توجه رسالة أولى لكريستيانو  رونالدو

يذكر أن وجهت الإعلامية ياسمين عز رسالة لكريستيانو رونالدو قائلة: "رسالتي بقى المرة دي لكريستيانو رونالدو أنا عارفة إنه بيتابع البرنامج وبيحبنا وبيحب البرنامج والنبي يا شيخ لو ليا خاطر عندك أجبر بخاطر البنت المسكينة دي "جورجينا" واتجوزها.. وأديك شوفتها في آخر ماتش، شيلاك في عينها صاينة عيالك ومحافظة عليها، وبعدين عمرها ما اشتكت رغم إنك ممرمطها وراك كعب داير من مدريد لإيطاليا ومن أولد ترافورد للمدينة التعليمية بالدوحة، ويا عالم بعد كده هتروح فين وتاخدها معاك الست ما بتقولش لأ من هنا لهنا حاضر".

وتابعت: "اتجوزها وإنشاء الله ربنا يكرمك أكتر.. ربنا يهديك وتراجع نفسك في موضوع الجواز ونشوفكم في الكوشة السنة الجاية بالجوازة التانية ومعاكم أولاد تانيين ونفرح بيكم".

ومن ناحية إخري، تداول رواد المواقع التواصل الإجتماعي وتحديدا مستخدمي منصة "تيك توك"، فيديوهات قصيرة من بعض مشاهد الإعلامية ياسمين عز، من مشاركتها السابقة كممثلة في أحداث مسلسل "بره الدنيا" بطولة النجم شريف منير، والذي تم عرضه عام 2010.

وجاءت التعليقات كالتالي: «هي ازاي عملت كده؟»، «عمليات التجميل وبلاويها»، «ياسمين في 2010 غير ياسمين بنت عز في 2022»، «هي ليه بتعمل عمليات كتير كده؟»

ياسمين عز

يُذكر أن ياسمين شاركت أيضا كممثلة في مسلسل "الصفعة" بطولة شريف منير، هيثم أحمد زكي، شيرين رضا، هيدي كرم، نجلاء بدر، هناء الشوربجي، عزت أبو عوف، كريم الدمنهوري، رحمة حسن، تأليف أحمد عبدالفتاح، إخراج مجدي أبو عميرة، وتم عرضه عام 2012.