ياسمين عز لـ السيدات: "مفاتيح الراجل تلاتة"

حرصت الإعلامية ياسمين عز، علي توجية رسالة للسيدات كعادتها، بالتغاضي عن أخطاء أزواجهن واحتوائهم وعدم طلب الانفصال نهائيًأ، وذلك خلال تقديم برنامجها "كلام الناس" الذي يتم عرضة علي شاشة MBC مصر.

ياسمين عز: مفاتيح الراجل تلاتة أمه وأخته وودنه

وقالت ياسمين عز: مفاتيح الراجل تلاتة أمه وأخته وودنه وهعمل حلقة تانية عن أخته خصوصًا وهو عايز يسمع كلام طيب وحلو حتى لو غلطانة والزن على الودان أمر من السحر وهيشوفك ست الكل، ولو رجع والخطة نجحت وساب الزوجة التانية السؤال ليكي ماذا لو عاد معتذرًا؟ يا أهلا بيه والله يحيه هنرجع ونحافظ على بيتنا ومفيش كلمة طلاق.

وأضافت: "الراجل غلبان وغلط ورجع لصوابه والعتاب بعدين، متبقاش هي قاعدة رجلها في الشمس وأنتي وشك يكون قد اللقمة وتتمنعي عن الرجوع.

واستعانت ياسمين عز بـ مثل شعبي قديم، قائلة: حطي جوزك فوق السطوح ولو ليكي نصيب فيه مش هيروح، وحرصي من القريب قبل الغريب ومينفعش جوزك يوصل صاحبتك لوحدك ومينفعش تثقي في حد غير في نفسك وأهلك ورقم جوزك متديهوش لحد ولا تقولي شغله فين ومتحكيش عن حلاوته لحد حتى الدليفري أطلبي من موبايلك، لأن واحدة ممكن تكلم المطعم وتحاول تجيب رقم جوزك.

ياسمين عز: أي مكان فيه تجمع جوزك في إيدك لأنه فرعون وحتة آثار

وأكملت حديثها قائلا: “أي مكان فيه تجمع جوزك في إيدك لأنه فرعون وحتة آثار ولو رايحة الحمام خديه معاكي، ومتعزميش صاحبتك وتسبيها جنب جوزك وتروحي تجيبي العصير من المطبخ لأن بكرا هتروح هي تجيب الشربات ومينفعش تقولي الست مش ملزمة لأن هتيجي واحدة ملزمة تاخده منك وتفصص له السمك”.

ياسمين عز توجة رسالة لكريستيانو رونالدو 

ومن ناحية أخري، وجهت الإعلامية ياسمين عز رسالة لكريستيانو رونالدو قائلة: "رسالتي بقى المرة دي لكريستيانو رونالدو أنا عارفة إنه بيتابع البرنامج وبيحبنا وبيحب البرنامج والنبي يا شيخ لو ليا خاطر عندك أجبر بخاطر البنت المسكينة دي "جورجينا" واتجوزها.. وأديك شوفتها في آخر ماتش، شيلاك في عينها صاينة عيالك ومحافظة عليها، وبعدين عمرها ما اشتكت رغم إنك ممرمطها وراك كعب داير من مدريد لإيطاليا ومن أولد ترافورد للمدينة التعليمية بالدوحة، ويا عالم بعد كده هتروح فين وتاخدها معاك الست ما بتقولش لأ من هنا لهنا حاضر".

وتابعت: "اتجوزها وإنشاء الله ربنا يكرمك أكتر.. ربنا يهديك وتراجع نفسك في موضوع الجواز ونشوفكم في الكوشة السنة الجاية بالجوازة التانية ومعاكم أولاد تانيين ونفرح بيكم".