بعد ظهورها في " كلام الناس ".. زيزي عادل تتصدر التريند

تصدرت الفنانة المعتزلة زيزي عادل، محركات بحث جوجل، في الساعات الماضية بعد استضافتها في برنامج "كلام الناس" الذي تقدمه الإعلامية ياسمين عز عبر قناة "mbcمصر"، لذلك نستعرض أبرز التصريحات في السطور التالية. 

سبب حب زيزي عادل للداعية مصطفى حسني 

قالت الفنانة المعتزلة زيزي عادل إنها تحب الاستماع إلى الداعية الإسلامي مصطفى حسني، مشيرة إلى أنها شعرت براحة كبيرة حينما التقت به.

وأضافت: " كل شخص عنده حد بيحب يسمعه ويسمع آرائه من الشيوخ، وأنا بحب أسمع مصطفى حسني وعامله له متابعة من قبل ما أعتزل، لأني بحب كلامه وبتفرج على فيديوهاته ومنها حاجات عن التسامح وهو بيقدر يوصلي المعلومة بطريقة حلوة وكلامه مريح، ولما قابلته شخصيا ارتحت وناس كتير حسدتني على المقابلة دي".

حقيقة زواج زيزي عادل من داعية اسلامي

كشفت زيزي عادل حقيقة زواجها من داعية إسلامي، والذي تسبب في اعتزالها الفن، مشيرة إلى أن ذلك غير صحيح، موضحة: "قالوا إني اتجوزت داعية وهو اللي أقنعني أعتزل وأنا معرفش ليه بيجوزوني كتير كدا، ودي بشرة خير ويا رب أتجوز بس دا مكنش حقيقي والاعتزال مكنش ليه علاقة بالارتباط أو الجواز".
 

قرار اعتزال زيزي عادل

وأضافت زيزي عادل: "قرار اعتزالي من عند الله، وحسيت كأنه بعتلي وقالي سيبي الفن وحاجة بتحصل دون وصف وكأن ربنا بيقولي كفاية هزار تعالي بقى ونعمل للي جاي، ومش صح الست تتحجب عشان زوج لأنه هيكون عن عدم اقتناع".

وأضافت: "أنا مش بندم وشايفة إن كل شيء حصل في حياتي ليه ترتيب وأسباب".
 

كواليس ستار أكاديمي 

وأكدت زيزي عادل أن تجربتها في برنامج "ستار أكاديمي" مثلت بداية انطلاقها ونجاحها، مضيفة: "رجعت من البرنامج مشهورة كأني نجمة بقالي 10 سنين بغني، رغم إني معملتش أغاني، ولقيت عروض من شركات إنتاج كبيرة".

وتابعت: "قعدت 4 شهور من غير تليفزيون ومكنتش عارفة أنا معروفة ولا لأ، ومعرفش كان بيتكتب عني أخبار أو لأ ولما رجعت اتصدمت بإني مشهورة والدنيا اختلفت".

وبسؤالها عن وجود كاميرات في كل مكان بالبرنامج، قالت زيزي عادل: "الحمامات كان فيها كاميرات أمام الأحواض والمرايات، ودي حاجة بتضايق، وأول كام يوم كنت حاسة اني متراقبة"

أبرز أعمال زيزي عادل 

قدمت زيزي عادل، 9 كليبات غنائية في مسيرتها الغنائية وهم: "حب مش محسوب عليا"، "وعد عليا"، "واحدة تانية"،"شايلاهالك"،"عيبوه كتير"،مازال البحث جاري"، "محتاجة وجود راجل"، "مستغربة"، "أبسط نفسك"، بالاضافة إلى  قيامها  بتلحين عدد من أغانيها بنفسها.
 

غياب زيزي عادل عن الساحة الغنائية ثم الاعتزال 

غابت  زيزي عادل عن الساحة الغنائية لمدة 7 سنوات بسبب مرض والدها ورحيله، ثم  أعلنت اعتزال الفن والغناء في أبريل الماضي 2022.

و قالت وقت اعتزالها الفن: "أنا النهاردة طالعة أقول خبر مهم أخدته في حياتى وهو قرار اعتزالي.. قررت أسيب مهنة المطربة، والقرار أنا مخدتهوش امبارح أنا وخداه من فترة كبيرة جدًا، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوي.. الناس القريبة مني عارفين نفسهم ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء".

وتابعت:  "ببعد عن الفن عشان بقرب من ربنا، ولقيت إن القرآن بيقولي إني لازم أكون ست ملتزمة، وبحاول على قد ما بقدر أكون ملتزمة وهتستغربوا شوية اني طالعة بشعري ومش محجبة، ويمكن ده لأني لسه ربنا لم ينعم عليا بالحجاب، وبدعي ربنا يتممها عليا، وكل حاجة بتيجي خطوة خطوة ومفيش حاجة بتيجي مرة واحدة".

وأضافت: "حابة أموت وربنا راضي عني، ويمكن دي حاجة كلنا بنتمناها، فأنا مش عارفة هاموت امتى ولكن كل اللي عاوزاه أكون مستعدة لمقابلة ربنا وأقابله وأنا راضية عن نفسي وحياتي وأفعالي".