وفاء مكي: 'اللي بيحصلي مش عقاب من ربنا.. وأنا عاوزة أقف على رجلي وأكل لقمتي بعرق جبيني'

تحدثت الفنانة وفاء مكي، عن فترة غيابها عن الساحة الفنية الفترة الماضية، مؤكدة أن ما تمر به حاليًا من ضائقة مالية ليس عقابا من الله بسبب قضية تعذيب الخادمتين في منزلها.

وقالت الفنانة وفاء مكي في تصريحات صحفية: الكيل طفح وفاض بيا وتعبت ومش قادرة أستحمل أكتر من كدا، بقالي 10 سنين عليا ديون وعندي أمي عيانة وطفل يتيم والتزامات، الديون وصلت عليا لـ 500 ألف، وصحابها موجودين ممكن تسألوهم، معنديش مصدر رزق غير المعاش بتاع الوالد وأخدت بضمانه قرض، بعتمد على باقي المعاش بشتري بيه زجاجتين زيت، وعلى مساعدات من أهل أمي.

وفاء مكي: قضيتي بقالها 23 سنة وعملت بعدها بطولات ومسلسلات

وإضافت: ابني من كام يوم كان جعان وقعدت أدور على جنيهات لحد ما جمعت 5 جنيه أشتري بيها عيش.. بيقولوا اللي بيحصل لي ذنب اللي عملته، طب ابني ذنبه إيه، ابني مالوش ولا حول ولا قوة عشان يتعاقب، وليه ما نقولش إذا ربنا احب عبدا ابتلاه علشان يشوف مدى صبرك وتحملك وقضيتي بقالها 23 سنة وعملت بعدها بطولات ومسلسلات.

وفاء مكي ستعتصم أمام نقابة المهن التمثيلية

وكشفت وفاء مكي عن رغبتها في الاعتصام أمام نقابة المهن التمثيلية إلى أن يجدوا حلًا لأزمتها، موضحة: خدت سلفة من نقابة المهن التمثيلية وعليا وصلات أمانة، وعارضة شقتي للبيع وهبقى أعيش في شقة إيجار جديد، وهعمل اعتصام في النقابة وهضرب عن الطعام لحد ما يشوفوا لي حل بطريقة حلوة ومشرفة.

وفاء مكي: أنا عاوزة أقف على رجلي وأكل لقمتي بعرق جبيني

واختتمت وفاء مكي حديثها، مؤكده على أنها برغم ما تمر به خلال الفترة الحالية، إلا أنها على استعداد للعودة من جديد للساحة الفنية بسبب حبها الكبير للفن، قائلًا: أنا رغم اللي بيحصلي لي لكني بحب مهنة التمثيل، ولكني طلعت غبية ومعملتش حساب للزمن، وحسبنا الله في كل من جار عليا وظلمني، وهفضل أعمل استغاثة وأستغيث بالمسؤولين وذنبي في رقبة كل مسؤول.. أنا عاوزة أقف على رجلي وأكل لقمتي بعرق جبيني، شوفوا أنا كنت إيه، ومش محتاجة يرموا لي أي حاجة ومينفعش أقل عن المستوى.