ابن حلال وأحس معاه بالأمان.. مواصفات شريك حياة نادية الجندي لـ عام 2023

كشفت الفنانة نادية الجندي، خلال مداخلة هاتفية ببرنامج “الستات” عن أمنياتها للعام الجديد، مشيرة إلى أنها تتمنى تقديم عمل سينمائي جديد، إلى جانب حديثها عن مواصفات الشخص الذي تتمنى الزواج منه.

وقالت نادية الجندي: أتمنى في السنة الجديدة أقدم عمل في السينما، لأنها في دمي وهي كل حاجة في حياتي، وأنا زي السمكة لما تخرج من المية تموت، لأني لو ما وقفتش قصاد كاميرا أحس أني هموت وحياتي انتهت، ولأني من وأنا طفلة وعمري 13 سنة بمثل ومن 5 سنين بمثل في المدرسة، والحكاية بقت جوايا الكاميرا هي حياتي.

وأضافت نادية الجندي: لازم أقف قدام كاميرا في عمل أكون مقتنعة به، وسعيدة به وأنا بأديه وحاسة أني بعمل حاجة جديدة وشخصية مختلفة فيها تحدي، لكن اللي بيتعرض عليا أدوار مكررة وحاجات سطحية.

مواصفات شريك أحلام نادية الجندي

وتتطرقت نادية الجندي في الحديث عن مواصفات شريك حياة نادية الجندي، حيث أنها لا تمانع من الزواج إذا وجدت الشخص المناسب، قائلة: الأهم بالنسبة لي في العام الجديد العمل في السينما ولو لقيت ابن الحلال يبقى مفيش مانع.

وإضافت عن مواصفات شريك أحلامها: يكون ابن حلال بس مش طالبة أكتر من كده بمعنى أحس أنه سندي ومقدر قيمتي وحنون وأحس جنبه بالأمان لأن ده أهم إحساس في العالم.

ومن ناحية أخري، أكدت نادية الجندي أنها قدمت أعمالًا درامية ناجحة، قائلة: أنا قدمت خمس أعمال درامية زي مشوار امرأة ومن أطلق الرصاص على هند علام والملكة نظلي، والأعمال دي نجحت جدًا بنفس مستوى أعمالي في السينما.

كما إشارات نادية الجندي إلي إنه يجب أن يكون الفنان قدوة ونموذجًا للجمهور، وأن يحافظ على مظهوره ولياقته، قائلة: الفنان لازم يكون قدوة ونموذج للناس، ولما بحافظ على شكلي بحس إني بحترم جمهوري، ولما بيشوفوني بيقولوا لي إحنا بنحبك علشان بتحترمينا، لأن الفنان ما ينفعش يطلع بشكل تخين ومنظره كئيب، وده جزء من عملي إني أكون ملتزمة طول الوقت بشكلي ولياقتي البدنية، لإني بعمل أدوار صعبة وكلها أكشن وده جزء من عملي.

وأضافت: النهادرة الثقافة العامة إن الستات والرجالة يهتموا بشكلهم ورشاقتهم، وأصبح هناك اهتمام بثقافة الرياضة والرشاقة والتجميل ودي حاجة الناس ما كانتش بتهتم بيها زمان، ومالهاش عمر ولا سن سواء صغيرين أو كبار، لأن الوعي زاد أوي ودي حاجة جميلة.

نادية الجندي تكشف سر جمالها ورشاقتها

والجدير بالذكر ان نادي الجندي قد كشفت سر جمالها ورشاقتها، قائلة: الرياضة شيء مهم جدًا للناس كلها، والحرمان سر رشقاتي لأني حارمة نفسي من الأكل طول الوقت... هناك أمور أخرى مهمة أولًا ربنا فوق أي حاجة لأنه بيدي الإنسان الشكل الحلو والكاريزما والروح الحلوة اللي بتخلي الناس تحبه وتتقبله ولما يلبس أي حاجة بسيطة تكون فخورة به وحباه في كل الأوضاع لأن ربنا في كل اعتبار.