نيللي لـ "الستات مايعرفوش يكدبوا": أرشح دنيا سمير غانم لتقديم الفوازير

وجهت الفنانة القديرة نيللي، الشكر، لبرنامج "الستات مايعرفوش يكدبوا" خلال حلقة اليوم التي قدمتها الإعلاميتان منى عبد الغني وإيمان عز الدين، بعد احتفال البرنامج بعيد ميلاد الفنانة الكبيرة.

وخلال مداخلة هاتفية بالبرنامج عبر قناة cbc، أعربت نيللي عن سعادتها قائلة:" أنا بأشكركم جدا وبحبكم قوى على أنكم افتكرتوني، أنا بشوفكم كل يوم".

وكشفت نيللي عن أكثر عمل له مكانه كبيرة من أعمالها التى قدمتها خلال مسيرتها، مضيفة:" أنا دايما فاكرة فيلم (العذاب امرأة) لأني أنا وقتها اللي صممت أختار الدور اللى قدمته، وقتها كان في دورين وقررت أختار دور السيدة الشريرة ورفضت تقديم الدور اللى له مساحة أكبر وعملت شخصية الست اللى مش طيبة".

ووجهت الفنانة القديرة نيللى، نصيحة هامة لكل السيدات، قائلة: "بقول لكل الستات لازم نسامح، التسامح بيحقق رضا النفس، والرضا هيخلق السعادة، واننا منبصش للحاجات الوحشة ونبص للحاجات الحلوة عشان نكون سعداء فى حياتنا"، مؤكدة أن الحب يجعل المرأة "منورة" ويؤثر على حياتها بشكل إيجابي.

وأشادت نيللى بالممثلين والممثلات الشابات من الجيل الجديد، قائلة: "أنا بحب الجديد دايما، لأنه حاجة بتدي أمل في الحياة، وبحب دنيا سمير غانم جدا، وهى تقدر تقدم الفوازير لأنها موهوبة".

وبسؤالها عن الدور الذي كانت تحلم بتقديمه، أجابت نيللي: "يا بخت من زار وخفف، والله أنا عملت كل حاجة واستمتعت كثيرًا بأدواري اللي قدمتها، أنا بحب الشخصية الفرعونية وكنت أحب أقدمها عشان رقبتي طويلة زي رقبتها، وأنا بحب نفرتيتيي وحاطه صورتها عندي".