خاص |رامي وحيد: مشكلتنا بنروح للموضة واحنا عندنا فن عظيم أهم من تكراره
شهد الفنان رامي وحيد، العرض الخاص لمسرحية "كازينو بديعة"، وأعرب عن سعادته لحضور هذا العرض وبكل نجومه، وأوضح أن نجوم " كازينو بديعة " اصدقاءه، بداية من الفنانة سمية الخشاب بطلة العرض، حيث أول لقاء بينهما في مسلسل " حدف بحر ".
وأضاف رامي وحيد خلال تصريحات خاصة لـ "الفجر الفني":" كل نجوم مسرحية كازينو بديعة أصحابي منهم النجم إدوارد اشتغلت معاه أفلام ومسلسلات عديدة، وأحمد فتحي، وطارق الإبياري صديقي وفرحان بأول تجربة إخراج له وعلاء مرسي بيضحكني من قلبي، وأتمنى نشوف عرض كويس".
السيرة الذاتية في الأعمال الفنية
وعند سؤاله عن سرد قصص المشاهير قال:" أنا ضد السيرة الذاتية وبحب الإبداع وكلنا بنحب تاريخنا الفني بس أنا مع الأفكار الجديدة وضخها للفن عشان الناس تحصلهم حالة من المتعة الفكرية ، وخلي الناس تختار، لكن انا مع الإبداع والتجديد، وأننا نعمل أفكار خارج الصندوق ".
وتابع: " أتمنى اشوف نوعيات من المسرح كبيرة ومختلفة، أصل اليومين دوول فيه سيدتي الجميلة وكازينو بديعة احنا مشكلتنا بنروح للموضة أوي، حاجة نجحت عايزين نكررها، أنا جاي مبسوط وبتفرج على كازينو بديعة ولو إني بميل لأفكار تانية لإن إحنا عندنا فن عظيم وافلامنا اكيد أعظم وأهم من فكرة إننا نكررها ".
وعن الشخصية التي يتمنى تجسيدها قال: "نفسي في أقدم شخصية سيف الله المسلول خالد بن الوليد وأتمنى أن العمل يسمح بانتاجه على شكل جيد لأننا بنتكلم في فتوحات وتاريخ إسلامي عظيم، كنت أتمنى أعمل الشخصية دي تحديدًا".
إثارة الجدل
وعن جدل الحلال والحرام قال رامي وحيد: " أي حد ممكن يثير الجدل واحنا معندناش ثوابث في ديننا والثوابث الأساسية هي القرآن الكريم، أى حاجة تانية احنا بنقول استفتي قلبك، القرآن فيه مراجع كبيرة واحنا بنحمل القرآن فوق طاقته ".
وأضاف: "ربنا خلق كل الأديان السماوية بقوانين بتسلم بعض إلى أن جاء القرآن بيقول واحد اتنين تلاتة منحملوش بقي معجزات وحاجات علمية خطأ والعلم كل يوم بيتغير، ما ينفعش نحمل الآيات تحليلات علمية وبعد كده ننفيها انا شايف إن ده بيعمل جدل، والكتاب واضح مفهوش شك، أي حاجة تانية تبقي وجهة نظر فنية".
وواصل: " طول ما احنا بنعمل فن، الفن مثير للجدل واحنا بنعمل للصحابة هي وجهة نظر فنية بحتة احنا مش بنقول أن ده الحقيقي وأتمنى الجدل يكون فيه ناس عندها وعي كبير جدًا عشان تقدر تفصل الثوابت، وهذا أمر كبير بين فصل الثوابت وسن القوانين، مفيش حاجة ثابتة غير إيمانك بدينك والباقي كله وجهات نظر".
الحرية في الفن
وعن حرية الفنان أوضح رامي وحيد: " كل فنان يحب أن يكون له مساحة من الحرية الفنية ويثير للجدل ويقدم ألوان متعددة وعلى الناس تختار وانا مش ابقى واصي على حد ".
واستكمل: " أمنية حياتي ميبقاش فيه رقابة عشان يبقي عند الناس المتعة الفكرية ولا يكون فيه رقابة على كتب ولا فن ولا ألوان معينة ".
إساءة الفنانين
وعن واقعة منة شلبي الأخيرة قال: " الغلط غلط وأنا ضد الغلط، ومعرفش الواقعة عاملة ازاي، والإساءة تسيئ لكل الفنانين مش إساءة لفرد وأنا كل ما ابقي نجم كبير والناس بتحبني لازم ابقي حريص أكثر، وماحطش نفسي في موقف يقلل نظرة الناس ليا وحبهم".
وأضاف: " أتمنى من زملائي تاخد بالها أوى والحرية مطلوبة ولكن أنا رضيت اشتغل شغلانة الفن وعارف الناس بتحط رأيها بشكل كبير جدًا فلازم اخد بالي لأني أنا مثل أعلى والضوء متسلط عليه".
