المطربة هدى: بصرف على الأغنية من جيبي ورافضة عقد الاحتكار وشوفت أيام مفيش مليم في بيتي  

حلت المطرب هدى ضيفة ببرنامج "كلام الناس" المذاع عبر قناة "إم بي سي مصر"، أمس الجمعة،  وتحدثت عن كواليس من حياتها الشخصية والفنية وسبب غيابها عن الساحة الفنية فترة طويلة وأزمتها المالية، نستعرض أبرز تصريحاتها في السطور التالية. 

انتقاد المطربة هدي حديث ياسمين عز

وانتقدت المطربة هدى خلال حوارها بالبرنامج، الإعلامية ياسمين عز، قائلة: "إزاي أكون مع جوزي في البيت وأقوله يا أستاذ محمد، مش كده يا ياسمين".

وتابعت: "أحترام جوزي ده يكون بين الناس ومساحة الهزار تكون في المنزل ولكن لكل موقف له تصرف".

حقيقة علاقة الرجل بالمرأة

كما تحدثت المطربة هدى، خلال حديثها مع ياسمين عز، عن علاقة الرجل بالمرأة، فقالت: "الحياة مشاركة لكن مينفعش هي تبقى شايلة الكفة الأكبر وتساعده لو هو شايلها وسند ليها، والناس كلها ذكور بس مين بقى راجل والأفعال اللي هتبين الراجل".

واستكملت النجمة هدى، وقالت: "قفلة الباب مش سهلة ولما النفوس بتشيل بيبان كل حاجة وممكن راجل بلا شيء بيبقى شايلك ومش يحسسك بحاجة لكن أغلبية الرجالة عايزة تاكل وتشرب والستات هي اللي تصرف عليها".

سبب غياب المطربة هدى عن الغناء 

وتحدثت المطربة هدى عن سبب غيابها عن الساحة الفنية، وقالت: "الظروف بتاعة فيروس كورونا وإني بشتغل وبنتج لنفسي فمش دايما هتبقى الحياة حلوة، وأنا مختفية عشان كنت مقلة جدا في السوشيال ميديا".

أشهر أغاني المطربة هدى

وتطرقت الفنانة هدى بالحديث عن أشهر أغانيها، والتي تألقت بها وهي أغنية "بين نارين"، فقالت: "أول ألبوم خلصته وبنعمل أول أغنية في الألبوم التاني، سمعت الأغنية دي من غير مزيكا وعجبتني جدا وقتها، ومكنوش راضيين يدوهالي، وبعدين خدتها وكانت وش السعد عليا".

وأضافت المطربة هدى: "أنا عمري ما وافقت أمضي مع حد عقد احتكار، وأما بتصرفي على نفسك وشغلك بيبقى أفضل، وطول الوقت بصرف على الأغنية من جيبي"

تعرض المطربة هدى لأزمة مالية

أوضحت المطربة هدى عن تعرضها لأزمة مالية، فقالت: "أنا اتعرضت لـ أزمات مادية كتيرة ومكنش معايا مليم في البيت، ومن الوقت للتاني بيكون في دروبات عندي مانا زي الناس وبيكون عندي مسؤوليات تانية وكمان عندي بنتي وحاجات مسؤولة في رقبتي، فلو فيه شوية فلوس بنكون بردو بين نارين مش هعمل أغنية وهدفع فلوس المدرسة عشان انت مقلة بيصبرك شوية، وكان بيجي عليا أيام ألغي درس بنتي عشان المصاريف وميكونش فيه مليم في البيت".

وتطرقت هدى في حديثها: "أنا عمري ما طلع عليا إشاعة غير إنهم كانوا يشبهوني بـ حكيم البنات، وجه على بالي كتير إني أعمل ديو مع حكيم لكن عمر ما كان بجدية".

نصيحة ياسمين عز للسيدات 

وقالت ياسمين عز فى بداية حلقة أمس: "هو أنا لما أقول للست احترمي زوجك، وامدح في الراجل الشقيان التعبان، وأقول بلاش الصوت العالي والندية والمناطحة، دي حاجة وحشة؟".

وكانت ياسمين عز، توجه نصيحة للسيدات، قائلة: "الرجالة غلابة وبيضحك عليهم بكلمة، جامليه هو لما تجامليه هياكل من ورثك حتة يعني".