يوسف الكدواني: ردود الأفعال على مشهدي مع صبري فواز في "وبينا معاد" أبهرتني.. ومصدقتش آراء الجمهور في أدائي (خاص)

حقق الفنان الشاب يوسف الكدواني، نجاحًا كبيرًا في مسلسل "وبينا ميعاد" وأصبح حديث السوشيال ميديا بعد مشهده في الحلقة 23 مع الفنان صبري فواز.
وتحدث "يوسف الكدواني" في تصريح خاص لـ "الفجر الفني "عن كواليس هذا المشهد وايضًا كشف لنا عن رأيه في القضية التي يناقشها المسلسل.

كشف يوسف الكدواني لـ "الفجر الفني" كواليس مشهده مع الفنان صبري فواز، واستقباله لردود الأفعال عليه قائلًا: "ردود الأفعال أبهرتني جدًا مكنتش مصدق أن رد الفعل هيكون كدة ؛ لأن إحنا بنكون شغالين مش بنكون عاملين حسابنا أن المشهد ده هيعمل جدل علي السوشيال ميديا ولا المشهد كذا ده هيعمل جدل".

وأضاف: "إحنا بنشتغل حابين اللي بنعمله بنكون عايزين نعمل أحلي حاجة عندنا وبس أن الناس تحبه بقا علي السوشيال ميديا أو الناس متتقبلهوش دي حاجة بتاعت ربنا وحاجة مش بأيدينا خلاص لأن احنا عملنا الشغل وعملنا اللي علينا ولكن طبعًا الحمد لله أن الناس اُعجبت بالمشهد ده".

وعن استعداده لذلك المشهد قال: "تجهيز المشهد ده كنت أنا وأستاذ هاني كمال وأستاذ صبري فواز، قعدنا واتكلمنا فيه قبل المشهد علطول واتناقشنا أن ده حالة معينة ل علي وأن الصدمه بتاعت الأب لأن (علي) مكنش مدي أي تنبيهات من الأول أن ده ممكن يحصل، والصدمة كانت كبيرة جدًا و(علي) اتاخد علي غفلة والصدام هنا قعدنا نتناقش فيه رد الفعل هيبقي ايه والأب هيعمل ايه وشوفنا أن اللي حصل ده هو أنسب رد فعل من ناحية حسن وناحية علي".

وأوضح يوسف الكدواني، رأيه في القضية التي يناقشها المسلسل قائلًا: "أنا مبسوط أن المسلسل بيناقش فكرة الأب اللي مصاحب أولاده أوي وشوفنا مميزات وعيوب الموضوع ده، وبردو شوفنا الأم المتشددة جدًا مع بناتها وشوفنا مميزات وعيوب ده ف أنا معنديش التركيبة الواحدة اللي شايفها أنسب حاجة ولكن أنا شايف أن كل واحد يبص ع العلاقتين دول ويستفيد هو من ناحيته يشوف إيه اللي غلط فيه هنا وايه اللي عمله صح من هنا"

وعن تطور علاقته بأروي خلال أحداث الحلقات القادمة أوضح قائلًا: "ما دي حاجة أحب أسيبها ل السوشيال ميديا بردو ونفضل نتكلم عليها لحد ما نشوف هنوصل لايه مش حابب احرق حاجة ولكن يعني هو شجعها وهو شايف أنه يقدر يدعمها لإنه قبلها علطول كان شايف هي قد ايه فاقدة الثقة ف نفسها وهنشوف ف الحلقات الجاية ايه ممكن يحصل".

"وبينا ميعاد" من إنتاج الشركة المتحدة للخدمات الإعلامية، وسمارت ميديا للمنتج إبراهيم حمودة، والإشراف على المحتوى الدرامي بالشركة المتحدة يسري الفخراني. من تأليف وإخراج هاني كمال.من بطولة صبري فواز، شيرين رضا، مدحت صالح، خالد أنور، بسمة، وفاء صادق، داليا شوقي، أيه سليم، أسامة الهادي، يوسف الكدواني، يوسف إبراهيم، كنزي رماح، محمد العزازي ونخبة أخري من النجوم.