محمد رياض: عملت مدرس كيمياء.. والمدير رفدني بسبب "البنات"

قال الفنان محمد رياض إنه تخرج في كلية العلوم، وكان يحب الكيمياء للغاية، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه.

محمد رياض في مجال الكيمياء 

أضاف رياض، خلال حواره في برنامج "معكم منى الشاذلي"، على قناة cbc، أنه عمل في مجال الكيمياء قبل دخول الفن، قائلا: "أنا اخترعت حاجات.. والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع اكمل عشان التمثيل، وكنت شغال في الأبحاث والتطوير بتاع الشركة".

أوضح أنه عند تخرجه امتهن العديد من المهن إلى جانب دراسته في معهد التمثيل، قائلا: "أنا كنت لسه متخرج من كلية علوم وشغال كيمائي الصبح وبشتغل في معمل تحاليل وبشتغل في مدرسة بنات 3 أيام في الأسبوع لكنهم رفدوني".

تابع: "كنت لسه صغير عندي 22 سنة وشعري أصفر وحليوة وبروح لابس بتيشيرت وبنطلون جينز.. وأول ما دخلت المدرسة لقيت الطابور بقى فيه همس.. بنات بقى كلهم 18 سنة وعمالين بيتكلموا مين ده وبتاع".

كواليس محمد رياض في مدرسة البنات 

أضاف: "شوية ودخلت الفصل لقيت كله بنات وقاعدين جنب بعض بين الديسكات وزحمه، طلع إن البنات جم من فصول تانية يحضروا حصة الكيميا.. يعني المفروض الفصل 25 بـنت لقيت عندي 60 بنت.. وتقريبا الكيميا احلوت في عينهم ساعتها".

أشار رياض إلى أنه في اليوم التالي طلب منه المدير ألا يحضر طابور الصباح ثانية، ففعل ذلك، واستمر في العمل لفترة، إلى أن استدعاه المدير مرة ثانية لمكتبه، قائلا: "المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا.. أنا عندي بنات صغيرين ومينفعش احط الزيت جنب النار.. واترفدت من غير ما اعمل حاجة".

قرار اعتزال محمد رياض التمثيل 

من ناحية أخرى كشف الفنان محمد رياض خلال برنامج “ معكم” عن كواليس مسلسل العائلة موضحًا أنه قرر اعتزال التمثيل والابتعاد عنه قبل المسلسل، والذي عرض في عام 1994، قائلا:"كنت هبطل تمثيل وعلاقتي بالتمثيل كانت هتنتهي واترشحت للدور وكان دور عمري وكنت لسه في البدايات وكان رمضان وكان فرصة وكنت طاير من الفرحة ومكنتش مصدق نفسي".

وتابع: "وكنت هموت في الفرحة وانا واقف قدام ليلى علوي،  وسجدت لربنا أن هما ممشونيش من المسلسل وقالولي أن البروفه الساعة 5 أنا من الساعة 3 كنت هناك وكنت بذاكر".

وأضاف: "ولما روحت لقيتهم قالولي انت اتشالت من الدور والدنيا اسودت في وشي ونزلت مشيت من ماسبيرو للعباسية وكنت حزين جدا وكانت صدمة بالنسبالي، وقررت ابطل تمثيل واركز في مذاكرتي"

واستكمل: "هشام سليم اللي عمل الدور وصور 6 أو 7 مشاهد وبعد شهرين هو جه اعتذر وجاله تهديدات وقرر ميشتغلش ودوروا على حد تانيوأضاف:" جالي تليفون أن استاذ إسماعيل عايزني وقالي أن الدور مكتوب باسمك وربنا عايزك تعمله وحاولنا في كذا حاجة ويشاء القدر أن انا اللي أمثل، وده علمني اني مش بفرح أوي لما حاجه بتجيلي أو بزعل أوي".