أبرز تصريحات أنغام في برنامج "الحكاية"
أنغام: ضيعت عمري كله في الغناء.. وقررنا نستعرض تاريخي في "صوت مصر"
حرص الإعلامي عمرو أديب وفريق عمل برنامج "الحكاية" الذي يذاع على فضائية "إم بي سي مصر" أن يحضروا كواليس وتحضيرات وتسجيلات حفل "صوت مصر" الذي أقيم أمس في المملكة العربية السعودية بحضور نجوم الفن.
وأجرى أديب لقاءً خاصًا من نوعه مع الفنانة أنغام التي وتألقت خلال الحفل بشكل كبير وقامت بغناء أبرز أغنياتها المشهورة مثل لسه ناوي على الرحيل، في الركن البعيد الهادي، شنطة سفر، وسط تفاعل كبير من الحضور.
وتحدثت أنغام عن كواليس اليوم وقالت: "عملنا بروفات كتير عشان تكون مترابطين مش كل واحد بمزاجه وبيعزف وبيغني في حته لوحده، واحنا في الحفلة مش هنكون بنغني بس لا إحنا حاولنا نطور من نفسنا ونلعب على الاغاني وكمان في حاجات متغنتش على المسرح بالفعل هتتغنى حصريًا"
وتابعت: "وحاجات عملنالها إعادة صياغة ودخلنا الاوركسترا في كل حاجة تقريبًا احنا اعتمدنا المره دي على الوتريات والكامنجا والكنتروباص وكل الالأت دي وكل المستويات الصوتيه بتاعت الوتريات هتكون موجودة والجيتارات والدرامز وكل الاجهزة والناس هتتبسط بشكل كبير".
وتحدثت عن مشوارها الفني قائلة: "الواحد أما مشي مشواره بيحس إنه المشوار سرقه بطريقة غريبة ده بسبب إننا بنتعب جدا على طول في الاستوديو وطول الوقت قعدات مزيكا بتحصل دايما ومش بفارق الاستوديو عمري كله وسفر وجري، وعمري ما هقول إن عمري اتسرق لان بحس المشوار والغنا ده عمري كله، انا بغني من وانا ١٥ سنة فكنت صغيرة أوي لغايه دلوقتي ففعلا ده عمري كله بدأ من هنا".
فكرة وتفاصيل حفل صوت مصر
أما عن فكرة الحفل صرحت عنها وقالت: " أنا مفكرتش قي الموضوع لوحدي، المايسترو هاني فرحات فكر معايا وفريق عمل كامل كان بيفكر وفكرنا ازاي الناس تسمع الاغاني بصوت وبطريقة تاني وقررنا إننا لازم نمر على التاريخ كله وبعدين نختصر ونقول المراحل المهمة وتحس بالرحلة كويس أو ي، ومش شايفه أن كلمة الرحلة مش كبيرة عليا ولا لسه بدري عليها لان كل واحد لازم يعمل كل الحاجات دي في عز طاقته ويعمل كل إلى يقدر عليه".
تفاصيل عن الحفل
وشهد الحفل تواجد عدد كبير من الشخصيات العامة أبرزهم الإعلامي عمرو أديب والفنان هيثم شاكر والفنان عزيز الشافعي وحماقي وويجز الذين حرصوا على حضور الحفل.
وفي سياق متصل، تحدثت أنغام عن مصر خلال الحفل وقالت: "لو مكنش فى مصر معهد كونسرفتوار ومعهد موسيقي ومعهد باليه ومعهد سينما وأكاديمية فنون.. يمكن مكنتتش ظهرت أصلا ولا كنا ظهرنا كلنا كفرقة موسيقية وكهندسة صوت وكل تجهيزات الحفلة اللي شايفنها النهاردة..عشان نبقي بالمستوى الفني العالي ده"
وتابعت: "عشان كده أنا محظوظة ببلدي مصر اللي قدمت لكم الفن ده النهاردة، واللي بفضلها عليا ظهرت ودعمتني من صغري من ايام الاذاعة المصرية والحفلات مصر هي ال قالتلي كوني كده بقيمة فنها".
آخر أعمال أنغام
يعتبر آخر أعمال أنغام هي أغنية نسينا نعيش التي طرحتها منذ فترة على هيئة فيديو كليب وحققت ملايين المشاهدات بعد صدورها بفترة قليلة
كلمات الأغنية: فضلنا نعيش عشان ننسى وفي الآخر نسينا نعيش
هنلقى في الغياب فرصة وفي الآخر لقينا مافيش
ما سابناش الفراق نرتاح ولا جاب اللي سابنا وراح
ما حدش فينا زي ما كان بيتمنى يعيش بيعيش
بنفتكر الكلام بالحرف بنشتاق في الغياب الضعف
وأدي الدنيا اللي بتنسي كمان طلعت ما بتنسيش
بنفتكر الكلام بالحرف (بالحرف) بنشتاق في الغياب الضعف
وأدي الدنيا اللي بتنسي كمان طلعت ما بتنسيش
ما بينا وبين زمان سكة بنمشيها وما بنمشيش
حياتنا واقفة على خطوة نخطيها وما بنخطيش
ننسى إيه ولا إيه ولا مين إحنا لعبة فايدين الحنين
بنتراهن على النسيان ونتحايل عليه ما يجيش
بنفتكر الكلام بالحرف بنشتاق في الغياب الضعف
وأدي الدنيا اللي بتنسي كمان طلعت ما بتنسيش
بنفتكر الكلام بالحرف (بالحرف) بنشتاق في الغياب الضعف
وأدي الدنيا اللي بتنسي كمان طلعت ما بتنسيش
وفي الآخر نسينا نعيش
