حوار خاص للفنانة ماريا أسامة مع الفجر الفني
ماريا أسامة لـ الفجر الفني: العمل أمام أحمد أمين جعل ثقتي بنفسي تزداد.. وماحدث في جمصة لا بد أن يدفن بها.. (حوار)
حققت الحلقات الأولى من مسلسل الصفارة نجاحا كبيرا وذلك خلال العرض الرمضاني الحالي على شاشة تليفزيون قناة dmc، وتفاعل معها الجمهور ومع أبطال العمل "الصفارة".
حيث حاور "الفجر الفني" الفنانة ماريا أسامة عن دورها الذي قامت به خلال أحداث مسلسل الصفارة والذي كانت تجسد به دور "كارما" الفتاة التي تلعب دور شقيقة «شيرين - آية سماحة» وحبيبة «وجيه - طه دسوقي» وفي السطور التالية نرصد لكم كافة تفاصيل الحوار.
- بعد نجاح ماريا أسامة في دور كارما عاوزة أعرف إيه رد فعلك على ردود أفعال الجمهور ؟ وهل كنتي متوقعة نجاح الدور كده ؟
كارما دور مهم بالنسبالي أوي، البنت اللي علاقتها بوجيه بتتغير مع تغيير كل قصة، شد وجذب، من أول ما قريت الورق والقصة كلها شداني، وابتديت أشوف المشاهد وأتخيلها وأنا بقرأ وكنت بضحك، المميز في دور كارما أنه مش كوميدي صِرف، لا فيه كذا شعور ممزوجين ببعض، رومانسية وضحك وغضب وغيرة وغرور ودلع وكوميدي ومع كل ده، كرو ممتاز وكاست كله فنانين كبار بحبهم وأنا فانز ليهم ومخرج بتابع برامجه من البدايات وبستمتع بيها، وفريق كتابة يعتبر رقم واحد في الكوميديا الفترة الحالية، فا طبيعي جدا وأنا بقرأ كنت حاسة أني متحمسة أبدأ بسرعة أوي.
- ماريا بعد مسلسل "الصفارة" حست بفرق أو إضافة إلى خبرتها وموهبتها في التمثيل؟
أكيد، كل عمل لازم أطلع منه مستفيدة ومتضاف ليا كتير جدا، اتعلمت واخدت ملحوظات وشوفت نتيجة الشغل وهكون أحسن في حاجات خدت بالي منها المرة دي المرات الجايا، بالإضافة إلى إن الدور كان مختلف عن الأدوار اللي عملتها قبل كده، وده بيحمسني أكتر.
- لو قولنا ماريا اتعلمت شيء واحد كان قوي من العمل مع فريق مسلسل الصفارة هيكون إيه؟
أستاذ علاء بالنسبالي مكسب كبير أوي أوي وفي نفس الوقت بعتبر نفسي من المحظوظين أنه يختارني في دور رئيسي في أول عمل درامي من إخراجه، معاملته وتشجيعه وملحوظاته واهتمامه بكل التفاصيل، كان بيخليني طول الوقت حابة الشغل وعندي شغف أكمل تصوير وأبقى فى كامل تركيزي مهما تطول ساعات التصوير.
- علاقتك كانت عاملة إزاي مع أبطال مسلسل الصفارة؟
فيه جملة أستاذ أحمد أمين بيقولها في المسلسل كتير ( انتوا عاملين حالة حلوة أوي يا ولاد ) ودي الجملة اللي هوصفلك بيها فعلا ورا الكاميرا كنا عاملين ازاي.
- متوقعة رأي الجمهور بعد ما مسلسل الصفارة ينتهي إيه؟
أنا بحب أتابع ردود الأفعال جدا، عن المسلسل عموما مش عني، والحمد لله كرم ربنا كبير في ردود الأفعال، وثقة الناس في أستاذ أحمد أمين كانت صك أمان للجمهور أنه يحبنا كلنا ويتابع المسلسل، لأنه حقيقي عمره ما خذلهم.
- هل الدور اللي بتقدميه وتعدد الشخصيات في شخصية من الحواديت ده تشبه شخصية ماريا؟
دور كارما مختلف عن أي دور اشتغلته، بحكم تغيير شخصيتها من قصة لقصة، كنت بحاول ألعب عليها داخليا، دلوقتي بتعمل ايه في حياتها بتفكر ازاي، بتشتغل ايه، والأهم خطوط علاقتها مع أبطال القصص راحت لفين اللي أهمهم طبعا بالنسبالها «وجيه - طه دسوقي»، كارما فيها من" البنات" كتير أوي، مش بس ماريا والمميز إن هي كانت بتمثل وجهات نظر مختلفة عن بعض كليا في كل قصة عن التانية.
- بعد حملة الجمهور ومطالبتهم بعمل جزء تاني أو إكمال العدد لـ 30 حلقة هل ده ممكن يحصل ؟
الفكرة في حد ذاتها تكفي أن الجمهور ميشبعش منك ويكون عايز يشوفك تاني، أعتقد ده المكسب الحقيقي اللي كل فنان بيسعاله، أكيد كان نفسي نكمل أكتر لـ ٢٠٠ حلقة كمان، بس أهو الجمهور نوحشه، حاجة كده في الخفيف منه.
- ردًا على إلحاح الجمهور بسؤال إيه اللي حصل في جمصة تقوليلهم إيه؟
اللي حصل في جمصة، لازم يتدفن في جمصة يا ناس، مش ناقصين مواجع، وكفايا أوي اللي حصل في جمصة.
- توقعتي النجاح ده للدور في الأول قبل التمثيل أو كان بمعنى تاني عندك ثقة في نجاح العمل ولا قلقتي شوية؟
طول الوقت أكيد ببقى خايفة، وأنا عندي عادة كده فيا مش أحسن حاجة، أني مش بحب أتفرج على نفسي، بحس طول الوقت إن كان عندي أحسن بكتير.
لكن ثقتي في أن العمل ينجح، أكيد كنت حاسة بأمان جدا، أنا مع أسماء كبيره عندهم أمانة وحب وشغف لكل تفصيلة في شغلهم، فا لو فيه خوف في الموضوع، هو كان هيبقي خوف أني أكون مقصرة أو مش في أفضل صورة أقدر أطلعها بس.
- لو قولنا الإضافة في حاجة فكانت في إيه بالظبط معاكي؟ أداء مثلا أو ملحوظات فنية؟
الأعمال الكوميدية بالنسبالي أصعب أنواع الأعمال اللي ممكن تتقدم
وما بالك لو قدام أستاذ أحمد أمين ومع الأستاذ علاء إسماعيل، الشغل قدامهم كان بيخليني أثق في نفسي أكتر وأقول اللي حابه أقوله، وفكرة أنك تشتغل قدام اسم زي أستاذ أحمد بأريحية كده ده إضافة كبيرة زودتني خبرة كبيرة في وقت قصير.
أبطال مسلسل الصفارة
وجديرا بالذكر يشارك عدد من نجوم الفن في مسلسل الصفارة في رمضان 2023 بطولة الفنان أحمد أمين، والفنان طه دسوقي، آية سماحة، سامية طرابلسي، حاتم صلاح، محمد رضوان، محمود البزاوي، إنعام سالوسة، المسلسل من إخراج علاء إسماعيل، تأليف ورشة كتابة سارة هجرس، شريف عبد الفتاح، إنتاج شركة media hub- سعدي جوهر- تنفيذ أروما.
