محمد رضوان لـ الفجر الفني: "ليست أخلاقنا أن نفتعل تريند من النقد السلبي.. ورسالتي إلى كل زوج وزوجة كلام التريند لا يفيد"
حرص "الفجر الفني" على إجراء حوار خاص مع الفنان محمد رضوان بعد عرض أعماله الرمضانية وتحقيقها نجاحا كبيرا، والتي شارك في بعضها بدور البطولة والأخرى ضيف شرف، ولكن رغم هذا استطاع ترك بصمة لا تنسى في قلب المشاهد قبل عقله عن تميز أدائه.
محمد رضوان ينتقد مصطلح "التريند" و"التعليقات السلبية"
أشار الفنان محمد رضوان في حديثه الخاص مع "الفجر الفني" إلى بعض الأشياء التي لا تعجبه مثل التريند والتعليقات السلبية فقال: "غلط جدا المسألة أننا لازم كلنا نتحلى بالصدق والمصداقية، مينفعش نحور ونكتب حاجات غلط لأن ده مش من أخلاقنا أصلا، أخلاقنا بتحتم علينا منقولش حاجة محصلتش، مقولش عن حاجة مشوفتهاش، والتريند نفسه بيظهر لحد ما حاجة تانية بعديه بتبقى تريند، فبينتهي التريند وييجي تريند جديد فعمره قصير".
محمد رضوان وياسمين عز
كشف الفنان محمد رضوان عن رأيه في برنامج كلام الناس أو بالأحرى رسالته الذي تقدمه ال الإعلامية ياسمين عز فقال: "هو خالف تعرف والمسألة نفسها بالنسبالها أنها جات في صميم العلاقة بين الرجل والمرأة، وهي العلاقة بينهم ماهي موجودة من زمان ايه اللي جد، والناس كانت متعايشة مع بعضها، هي قومت الستات على الرجالة، احنا عايشين في سلام مش عايزين حاجات تنغص علينا عيشتنا، وده تفاصيل ناس متجوزة بقالها فترة وفي تفاصيل مينفعش نسمع عنها كلام هي عاوزة الست تقول استاذ وكلام أوڤر يعني".
ووجه رضوان نصيحته لأي زوج وزوجة قائلا: "يعيشوا زي ماهم عايشين ويتأقلموا مع بعض بالطريقة اللي تعجبهم، الكلام ده مش هيفيدهم، وميتجهوش لسماع كلام البرامج، لأن في ناس عقلها صغير شوية الحاجات ده بتأثر فيهم، المجتمع الأسري بتبقى تفاصيله أكتر من الكلام ده، ناس عايشة مع بعض عيشة تامة وده حاجات لا هتقدم ولا هتأخر".
وتابع رضوان قائلا: "الأصل في الموضوع إن الراجل مسؤول عن الست، مسؤول عن اسعاد الست، ياخد باله منها، والمسألة مش كده، وهي مسألة شراكة والاحترام المتبادل بين الاتنين هو اللي بيخلق الحاجات ده، طول مافي احترام متبادل بين الزوج والزوجة هيضمن اسعادها في البيت، مافيش حد بيتطاول على حد مافيش حد بييجي على حد، وده من عادتنا كمصريين ومسلمين، وده كما أوصانا الرسول احنا كرجاله على الست، أوصيكم بالنساء خيرا في خطبة الوداع".
