محمد رضوان لـ الفجر الفني: "أحمد أمين يفكر في الكوميديا بشكل مختلف وخارج الصندوق.. وأدواري ليس لها علاقة بشخصيتي الحقيقية"

حقق الفنان محمد رضوان نجاحا كبيرا هذا العام بأدواره الرائعة التي نالت إعجاب جمهوره والذي لعب أكثر من شخصية في السباق الرمضاني الحالي، في 3 أعمال وهم 'الصفارة' و'وعود سخية' و'بابا المجال'.

فاهتم "الفجر الفني" بإجراء حوار خاص مع الفنان محمد رضوان من أجل معرفة كافة التفاصيل منه عن دوره في "الصفارة".

محمد رضوان ورأيه في أحمد أمين وأفكار الكوميديا لديه

كشف الفنان محمد رضوان عن رأيه في أداء الفنان أحمد أمين بحكم العمل معا في مسلسل "الصفارة" وتنوع الأدوار بين التراجيدي والكوميدي وعن أفكار الكوميديا لديه، فقال: "الفنان لازم شامل وعارف كل الانواع، وأحمد أمين شغال على الكوميديا بقاله فترة خلال الأعمال والمسرحيات اللي كان بيعملها، فهو شغال في الكوميديا وبيفكر فيها كويس جدا، وبيفكر فيها بشكل مختلف، دايما بيفكر خارج الصندوق وبيعمل أفكار كويسة، وهو الممثل أن مكنش يبقى شاطر في التراجيديا وشاطر في الكوميديا هيبقى ممثل إزاي."

محمد رضوان وأقرب الأعمال لقلبه هذا العام

وأجاب الفنان محمد رضوان على سؤال "ماهو أقرب عمل للفنان محمد رضوان من أعماله هذا العام إلى قلبه" ليجيب قائلا: "كلهم أولادي، كل واحد مقداره كبير عندي، أنا عامل بطولة في سخية، على نفس درجة الأهمية في الدور اللي عامله في الشيخ لبلوب في الصفارة على نفس الأهمية في الدور اللي عامله في بابا المجال، أنا باخد كل دور على حدا وده للتنوع والاختلاف مبتعاملش مع المسألة إن كله تمثيل، لأن كل شخصية ليها طبيعتها وسلوكها واسلوبها".

محمد رضوان وتطابق شخصيته مع شخصية في مسلسل قدمه هذا العام

اختتم الفنان حديثه مع "الفجر الفني" بوجه التشابه الذي يجمع بين شخصية من أعماله هذا العام وشخصيته الحقيقية ليقول: "لا مافيش ولا واحد منهم، شخصية فهيم ده بعيدة خالص لأن ده راجل على طول عاوز يتجوز وهو اللي عمل كده في نفسه هو طريقته وعلاقاته بالستات هي اللي خلته يتحط في المواقف ده وهي انتقمت منه في الاخر، ورجب الخانكا ده واحد معاه شهادة معاملة اطفال".

محمد رضوان ورأيه في برنامج رامز جلال الجديد هذا العام "رامز نيفر إند"

كشف الفنان محمد رضوان في حديثه مع "الفجر الفني" عن رأيه في برنامج الفنان رامز جلال الجديد "رامز نيفر إند" فقال: "ما دام الناس بتحبه وتشوفه يبقى خلاص، بس كل واحد يستحمل اللي بيحصله".

محمد رضوان وظهوره ضحية مع رامز الاعوام المقبلة

أضاف الفنان محمد رضوان في حديثه عن برنامج رامز جلال وعن فكرة ظهوره ضحية فكاتت إجابته بالرفض، وقال: "لا أتخيل نفسي في الحاجات ده، مش عارف هبقى ضحية لازم ابقى عارف رايح أعمل إيه، وأنا مقل جدا في ظهوري في البرامج".

محمد رضوان ودوره الصغير في مسلسل الصفارة

أشار الفنان رضوان إلى أهمية دوره في مسلسل "الصفارة" رغم صغر الدور فقال: "لو مكنش دور مهم مكنتش عملته، هو دور مؤثر جدا في الأحداث لأن هو اللي فتح الأحداث ده".