المخرج أحمد سمير فرج يكشف لـ الفجر الفني سر اختياره لـ أماكن تصوير المداح 3

حقق مسلسل المداح 3 (المداح أسطورة العشق) نجاح هائل في الماراثون الرمضاني لعام 2023 ولذلك حرص الفجر الفني أن يتحدث مع المخرج أحمد سمير فرج مخرج سلسلة مسلسل المداح عن أهم اللحظات التي واجهها في المسلسل بالإضافة إلى سبب وسر اختياره لـ أماكن تصوير المداح 3 خاصة أن التصوير تم في أكثر من مكان فكشف لنا كل هذة الأسرار من خلال تصريحات خاصة وقال: "الفكرة كلها باختصار بتدور حول إننا بنعمل جزء تالت فكان ضروري جدًا إننا نتطور ونروح في أكثر من مكان وننوع عشان الجمهور يكون متحمس إنه يتفرج لإن فكرة الأجزاء دي فكرة صعبة جدًا خاصة 

 إنك عايز تخلي الجمهور يقعد يتابع مسلسلك ويحس إنه مسلسل جديد فكانت فكرتي في السفر الجديد كانت قايمة على التنوع لأن الناس لما تتفرج على أماكن تصوير جديدة مش هتحس إن ده المداح إلى بيتفرجوا عليه من الجزء الأول وحاولنا نبعد عن الأماكن إلى كانت موجودة في الجزئين الأولانين سواء بُعد صابر عن بيت أهله أو عن الفيوم" 

الدراما هي المتحكمة في أماكن التصوير

وبالإضافة إن الدراما هي إلى المتحكمة فينا يعني مثلًا اختيارنا لقنا كان عشان السيد عبد الرحيم القنائي واختيارنا لسانت كاترين عشان ده مكان طاهر ال نزل فيه صوت ربنا وكلم سيدنا موسى وهو برضه المكان إلى نزل فيه الوصايا العشر وصورنا كمان في الكنيسة إلى سانت كاترين إلى فيها 3 أديان مجتمعين وشجرة العليق وكل الشعائر الدينية الموجودة في المكان دي كانت ضروري تظهر عشان كده إحنا حاولنا نقدم معلومات قيمة للناس وحاجات الجمهور مكنش يعرفها

مصر بلاد الجمال والدين

وبالمناسبة ناس كتير من طاقم العمل كمان مكنتش تعرف أهمية سانت كاترين وقداسية المكان واتفاجئو وهو ده بالظبط  جزء من رسالتنا اننا كـ فنانين نوري الناس جمال بلادهم ونوضح أن صوت ربنا لما نزل، نزل في مصر على الارض في الوادي المقدس طوى فحابب أوضح إننا لما بنختار الأماكن للتصوير مش بنختارها بشكل عبثي بل بيكون مقصود وتصويرنا في أماكن مختلفة سواء في لبنان أو أي مكان حبينا نوضح ونقول إن الشر في العالم كله.

سبب اختيار فكرة عشق الجن للبشر

وأوضح لنا أيضًا سبب اختيار فكرة عشق الجن للبشر قائلًا: "إحنا من ساعة ما بدأنا المداح وكل مرة بندور على فكرة جديدة الناس متعرفش عنها كتير وبنكشفها للجمهور، فيعتبر اختيار فكرة عشق الجن للبشر فكرة مختلفة وتوقعنا إنها هتجذب الجمهور وهتكون مثيرة للجدل خاصة أن إحنا بنتكلم عن عالم موجود بالفعل وهو عالم الجن اللي له علاماته وأساسيته وتأثيره في العالم الحقيقي فـ إحنا بنحاول نختار الحاجة إلى تنفع دراميًا عشان نبني عليها الموضوع ووقع الاختيار على عشق الجن للأنس بزوايا مختلفة وخوضنا التجربة".

مسلسل «المداح» الجزء الثالث من بطولة حمادة هلال وهبة مجدي ويسرا اللوزي ومحمد عز وعصام السقا ودنيا عبد العزيز وحنان سليمان وهلا السعيد وعفاف رشاد وخالد سرحان ومحمود عامر وبسمة ماهر وتامر شلتوت وسلمى أبو ضيف ورانيا فريد شوقي ومحمد مهران ولوسي وعبد العزيز مخيون وأحمد ماهر وصبحي خليل وأحمد كشك، إنتاج شركة سكرمو ميديا- إسلام المرسي، من تأليف وليد أبو المجد وأمين جمال وشريف يسري ومن إخراج أحمد سمير فرج.