شريهان أبو الحسن لـ تامر حسني: "تنازل شوية عن العناد وفكر في ولادك" (فيديو)
قامت الإعلامية شريهان أبو الحسن، بنشر مقطع فيديو عبر صفحتها على موقع التواصل الإجتماعي فيسبوك توجه فيه رسالة للفنان تامر حسني.
وبدأت حديثها قائلة: “الحقيقة عايزة اتكلم معاكم في موضوع وانا مستغرباله ومسمعتش ولا قريت ولا شوفت لا على السوشيال ميديا ولا في الوسط الفني فكروا او بيقولوا كلمة واحدة تصلح او تقرب بين النجم الكبير تامر حسني وطليقته بسمة بوسيل”.
وأضافت: “ولا واحد حتى من اصحابهم اللي انا عارفة انهم صحاب اوي وقريبين اوي وبينهم حاجات كتير تسمح ان الصحاب دول يتدخلوا ويصلحوا مابين الزوجين مشوفتش اي محاولات كأن الدنيا كلها مستنية نجم كبير بحجم تامر حسني يكون في الموقف ده ونجم كبير وست جميلة زي بسمة بوسيل، كان الناس مستنية انهم يطلقوا مسمعتش كلام عن الصلح كأن الناس عايزة الطلاق مش عايزة القرب ومش عايزة الامور تبقى اهدى وأصفى”.
وتابعت: “بعض أصحابهم جايلي احساس انهم فرحانين بموضوع الطلاق ده ومش مكلفين نفسهم عناء دقايق ممكن قضوها مع صحابهم تامر وبسمة انهم يحاولوا يقربوهم”.
وقالت: “انا قربت من بسمة وهي ست طيبة وقربت من تامر وراجل قلبه نضيف، والحقيقة اكتر حاجة مهتمية بيها في الموضوع ده واكتر حاجة وجعاني مش تامر ومش بسمة لكن ولادهم التلاتة وهما ماشاء الله عندهم ٣ ولاد زي القمر، ليه مهتمية بالولاد لان ساعات الزوجين في المواقف اللي بتبقى زي في حالات الانفصال والدنيا بتولع مبيكونيش مهتميين ولا مشغولين بالولاد، ولادهم تاليا وامايا وادم نتاج علاقة حب بجد حقيقية، الحب الحقيقي ده اللي خلى بسمة لفترات طويلة وسنين طويلة تسمع وتشوف شائعات عن تامر وتستحمل وتكبر دماغها لان كان في حب حقيقي، الحب الحقيقي ده بردو اللي خلى تامر في اوقات كتير يحتمل ويتغاضى عن التهور اللي بسمة بتعمله على السوشيال ميديا وهو بنفسه قال عليها انها متهورة ورجعوا لبعض تاني الولاد دول نتاج الحب الحقيقي اللي جمع تامر وبسمة واللي خلاهم يستحملوا حاجات كتير”.
رأي شريهان أبو في سبب انفصال تامر حسني وبسمة بوسيل
وتابعت: تامر وبسمة صابهم كتير اللي بيصيب اي اتنين متجوزين بقالهم سنين طويلة، تامر وبسمة مش اتنين عاديين هما اتنين شباب طموحين ناجحين مشهورين بقالهم سنين متجوزين، واللي صابهم زي اي اتنين متجوزين بقالهم سنين الزهق الملل الرتابة التعود العتاب النقد المشاجرات والخناقات اللي موجودة في اي بيت، ويمكن كل واحد فيهم ممكن يكون بيفكر انه لو جرب تجربة تانية جديدة مع طرف تاني مع حد تاني هيكون ده اللطيف هتكون دي تجربة ناجحة وهتكون تجربة الطف والذ وهتكون فيها حاجات جديدة وشغف وزي مابيدور في بال اي اتنين، ولكن الحقيقة لما هيبعدوا شوية ويجربوا التجربة دي هيكتشفوا اكتشافات تانية خالص هيكتشفوا انه ملهمش غير بعض وان حياتهم مع بعض هو ده الصح والمظبوط ويمكن يتعبوا على علاقتهم أكتر من كده
واستكملت: انا مش عايزة ادخل في تفاصيل الشائعات واللي مكتوب واللي بيتقال واللي رايح واللي جاي ومين في حياة تامر ومين مع مين ومين بيحب مين ومش هخش في هذه التفاصيل لان كل المعلومات اللي بتجيلي انه كل الاطراف بتنفي هذه الاتهامات.
رسالة شريهان أبو الحسن لـ تامر حسني
وانا عايزة اكلم تامر المرادي واقوله ياتامر وبكل الحب والمودة ان انت اللي فتحت الباب للكلام الكتير وللي قيل والقال، وانك استسهلت انك تمشي وتسيب البيت وتقعد فترة كبيرة برا البيت وتعيش في المكتب وانك تسيب بيتك وبسمة وتخلي الناس تتكلم اكتر وتخلي النار تولع اكتر في قلب بسمة، ومش حلسة منك ان حافظت على البيت كنت المفروض تأدي أداء افضل من كده عشان تحافظ على البيت، وحكاية انه الاطراف الاخرى اللي مضايقة بسمة والستات التانية اللي شاكة فيهم بسمة واتوجهلهم بعض الاتهامات، حكاية ان هما اللي يتكلموا ويطلعوا سوشيال ميديا او هما اللي ينفوا ويحكوا حكاوي تانية عشام تهدي بسمة انا مش شايفاها حكاية صحيحة، انت اللي عليك الدور الاكبر وانت السبب في التوتر اللي وصلتله بسمة والنار اللي مولعة فيها سامحني وصديقك من صدقك، وبقولك بالوضوح والبساطة تنازل شوية عن العناد انزل شوية من هذا الكبرياء وفكر في تاليا وامايا وادم وانا حاولت كتير اكلمك وانت طبعا كالعادة وعادة اي نجم كبير كل يومين بتغير ارقام التليفونات.
واختتمت: "لو سمحت ارجع تاني لعقلك ولو في اي تهور انت تقدر تلم الموضوع انت تقدر تحافظ على بيتك وانت تقدر تحافظ على مراتك، ولو في اي حاجة بتزعل بسمة اقطع عرق وسيح دمه وخلص المواضيع وفي حاجات لازم تحسم، والحقيقي انا متأثرة جدا ع وزعلانة على هذه العلاقة وزعلانة عليكوا وعلى حبكم وعلى ولادكم، وبيروحوا مدارس وبيشوفوا الناس بتتكلم عنكم لاني شوفتهم وعارفة قد ايه هما ولاد جمال وارجع تاني فكر والامور تعدي على خير".
