سارة نخلة: "مرضاش أكون زوجة تانية أو جوزي يتجوز عليا"

أشادت الفنانة سارة نخلة، باعتراف الفنانة ألفت إمام بأنها زوجة ثانية، وتعمدت اخفاء ذلك خوفًا على عائلة زوجها، مؤكدة:" الزوجة التانية مش خطافة رجالة".

الزوجة الثانية 

وقالت سارة نخلة خلال برنامجها “Face off”المذاع على شاشة “هي”: “أول ما بنقول زوجة تانية يتقال عليها خطافة رجالة ولكن ده مش صح لأن رب العالمين قالنا ده مش حرام”.

حقيقة ألفت عمر كزوجة ثانية 

واستكملت سارة نخلة حديثها: “ألفت إمام قالت قبلت أكون زوجة تانية ومأعلنتش ده خوفا على عائلته، وممكن تكون أخفته عشان الأسرة أو أطفاله أو لسبب هي شايفاه مقنع.. رب العالمين شرع ده وكل واحد حر ولكن ما دام قررتي تكوني زوجة تانية استحملي ده”.

رفض سارة نخلة أن تكون زوجة ثانية 

وتابعت سارة نخلة: “أنا ضد ده تمامًا لا أقبل أكون زوجة تانية ولا أن زوجي يتجوز عليا، ودي وجهة نظري وممكن تختلف مع غيري على حسب ظروف كل شخص، والزواج الثاني ده ممكن مراته تكون تعبانة ومريضة وطلبت منه يروح يتجوز".

واختتمت سارة نخلة حديثها:  “في رجالة ماشية تقولك حلال ربنا نتجوز الأربعة، وربنا بيقول برضو فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة،  مش ماديًا فقط ولكن عاطفيًا واهتمام وكل حاجة ومشفتش رجالة خارقة بتعدل الحقيقة بين الزوجتين”.

سارة نخلة ترد على هجوم دعاء فاروق

من ناحية أخرى علقت الفنانة سارة نخلة، على الجدل الذي أثير بسبب حديثها عن المساكنة مع الفنانة بسنت النبراوي، الأسبوع الماضي، مما عرضهن لانتقادات لاذعة على مواقع التواصل الاجتماعي.

وردت سارة نخلة من خلال برنامجها “Face off”  على هجوم الإعلامية دعاء فاروق عليهن بسبب تناول المساكنة في الحلقة، قائلة: “حصل قلق بسبب حلقة الأسبوع اللي فات، رغم إننا أخدنا رأي الدين وتوصلنا في نهاية الحلقة إن المساكنة حرام، والمجتمع بيرفضها والعادات والتقاليد ".

وأضافت سارة نخلة: “ولكن في سيدة فاضلة طلعت عايزة تهاجم من غير ما تشوف الحلقة ولا أي حاجة من غير ما تفهم كنا بنتكلم في ايه، قررت تدخل تهاجم وبس، واحنا مش أول ناس تهاجمنا، وأنا على دماغي النقد البناء، ولكن كان لازم تردي بأدب واحترام، ولكن كنتي بتناقضي نفسك وأنتِ بتكلميني، طلعتي قولتي يعني إيه بتتناولوا حوار المساكنة كدا عادي، أنا مصحتش من النوم قررت أتكلم عن المساكنة، وعلى الرغم في فنان مصري طلع قال أنا عملت المساكنة ليه مهاجمتيش الفنان ده أو خفتي على الأطفال اللي بيتفرجوا عليه”.

وتابعت سارة نخلة: “الناس افتكرت إن في حاجة شخصية بيني وبين حضرتك ولكن مافيش سابق معرفة بينا وبين بعض ويمكن اللي بتقدميه مش من اهتمامي يعني البازار والهدوم هكذا، ومش فاهمة طريقة ردك يعني إيه تقولي متضايقة من لفظ المساكنة عشان خوفًا على تساؤلات الأطفال ولكن قولتي في نفس الفيديو لفظ دعارة عادي؟ على الأقل لو ابني سألني هقوله ده حرام وهكذا، ولكن قولتي دعارة يعني إزاي أقول لطفل دعارة؟”.