أمير كرارة يعترف: مسلسل سوق الكانتو تقليد لـ بيكي بلايندرز.. ومشوا الدنيا ومتحبكوهاش

اعترف الفنان أمير كرارة، خلال لقائه في برنامج الراديو بيضحك 90 90 أن مسلسله سوق الكانتو الذي عرض في الموسم الرمضاني الماضي 2023، مقتبسًا من المسلسل البريطاني بيكي بلايندرز، وذلك بعد الانتقادات التي تعرض لها صناع الفيلم.

اعترافات أمير كرارة

وقال أميرة كرارة: أول ما نزل البوستر أتقال بيقلدوا بيكي بلايندرز، اه إحنا بنقلده، أنا صريح جدا على فكرة، أنا كنت قاعد على الكرسي وحسين المنباوي جمبي وكان المسلسل شغال قلت له هموت واعمله.. ويا عم اه بنقلده إيه المشكلة لما نعمل حاجة شبهه ما فيه زمن بتاع البريهات والبالطوهات، مش كان فيه مصر ما تيجي نعمل الزمن ده، وعملنا حدوتة تانية خالص، وأنا حبيت أغير الشكل بشكل المسلسل بالحدوتة والزمن، فتلاقي اللبس والشوارع والديكور مختلف، وقلت لـ هاني سرحان نفسي أعمل حاجة شبه بيكي بلايندر.

أمير كرارة يعترف: مسلسل سوق الكانتو تقليد ومشوا الدنيا ومتحبكوهاش

وأكمل أمير كرارة: زي فيلم البعبع، اتقال بيقلدوا فان ديزل.. اشمعنى بره بقى له عشرين سنة بيطلع بالجينز والفلنة البيضة وهناك مكسر الدنيا. مشوا الدنيا وما تحبكوهاش واتبسطوا إحنا بنعمل حاجة لطيفة، ما هم بره بيقلدوا برضه، وفيلم مان فاير كسر العالم  مع أنه هو هو الفيلم اللي عمله أميتاب باتشان من عشر سنين، أصل الحب واحد والكره واحد والأكشن واحد والكوميديا واحدة، هي تيمة وبنعملها بشكل مختلف، ما إحنا شوفنا مسلسلات كتير لواحد ومراته حبوا بعض واتطلقوا.

أمير كرارة ينتقد المسلسلات التركي

واختتم أمير كرارة حديثه بـ انتقاد المسلسلات التركي، قائلا: ما أنتم بتتفرجوا على تسعين حلقة في المسلسلات التركي والأحداث واحدة، ومش عارف بتتفرجوا على أيه ومبسوطين ليه، ومفيش أحداث وحاجة ملل وزعيق وصويت، وصعبة أوي، يعني أقعد مع مراتي ألاقي المسلسل فيه واحدة بتعيط علشان شافت حبيبها في الكشك معاه واحدة بعد 8 حلقات ألاقي البنت خارجة من الكشك، بس هي عقدة الخواجة تقريبًا.

أحدث أعمال أمير كرارة

ويذكر ان أمير كرارة يعود للسينما بفيلم البعبع بعد غياب 3 سنوات كاملة إذ قدم آخر أفلامه "كازابلانكا" الذى عرض في عام 2019 وحقق إيرادات بلغت 80 مليون جنيه، وشارك في بطولته غادة عادل، اياد نصار، عمرو عبد الجليل، لبلبة، أحمد داش، وخلال العامين الماضيين اكتفى كرارة بالظهور كضيف شرف في السينما خلال فيلمى "سبع البرمبة" مع رامز جلال و"موسى" مع كريم محمود عبد العزيز