رضا البحراوي: "أعمل أي حاجة في الدنيا علشان أمي"

تحدث الفنان رضا البحراوي من خلال مقابلته مع الفنانة إسعاد يونس في برنامجها صاحبة السعادة المذاع عبر شاشة قناة DMC عن عائلته معربا عن حبه الشديد لوالدته. 


 

وأضاف:" أول فرح دخلته في الإسماعيلية الناس شالوني وأبويا عيط، ولما نزلت من الفقرة ربنا كرمني وفتح عليا، أنا اشتغلت حاجات كتير ومطلعتش بالساهل، والدي ووالدتي على قد حالهم، وأي حاجة في الدنيا أعملها عشان أمي".

 

رضا البحراوي:"أنا براعي ربنا في كل حاجة 

وتابع:" أنا براعي ربنا في كل حاجة وطالما رضيت أهلي وإخواتي ربنا هيكرمني، يعني أمي وبعدين أبويا وبعدين إخواتي وبعدين مراتي وبعدين عيالي، وكل يوم لازم وأنا رايح الشغل أعدي على أمي تدعيلي، وتزعل لو معدتش عليها وساعات تضحك عليا وتقول أنها تعبانة عشان أروح، هي حياتي كلها ". 


 

وفي سياق متصل، تحدث الفنان رضا البحراوي، عن تفاصيل بدايته الفنية، مؤكدًا أنه بدأ الغناء منذ عمر الـ 8 سنوات، كما أعرب عن حبه الشديد لعائلته وبالأخص والدته.

 

وقال:" أنا بدأت أغني وأنا عندي 8 سنين، وغنيت في الشارع ومكنتش حاسس إن صوتي حلو، ومنتج شافني وقالي صوتك حلو، وأول مرة شافني كنت بلعب بلي في الشارع وعدى عليا وغنيت وإداني 10 جنيه، وطبعا الحالة المادية كانت على قدها والحمد لله طارق عبد الستار عملي شريط وقبل ما أعمل الشريط كنت بغني في الحنن والأفراح".

 

رضا البحراوي:" كنت بغني لرمضان البرنس وجورج وسوف

واستكمل:" كنت بغني لرمضان البرنس وجورج وسوف، وكنت بقول نفسي أوصل أبقى زي رمضان البرنس، والشريط نزل ساعة مولد السيد البدوي، وبعد أسبوع جالي حد من إسماعيلية وخبط على الشباك وأمي قالتله أنت عايز رضا ليه؟ وهي متعرفش إني بغني، والراجل سابلها بطاقته وقالها هرجعهولك تاني، وأول أجر أخده كان 300 جنيه".